Կամո Արեյանը Երևանի քաղաքապետարանի բոլոր ծախսերն հիմնավոր ու անհրաժեշտ է համարում

 Երևանի քաղաքապետարանի բոլոր ծախսերը նախատեսված են Երևանի ավագանու կողմից հաստատված բյուջեում. Նշեց Երևանի փոխքաղաքապետ Կամո Արեյանը՝ պատասխանելով դիտարկմանը, թե Երևանի քաղաքապետարանն ահռելի ծախսեր է անում այն դեպքում, երբ քաղաքի բնակչությունն աղքատ է: «Բոլոր այդ ծախսերը հիմնավորված են, անհրաժեշտ են համայնքի ծառայությունների համար: Դրանք բխում են համայնքի շահերից: Համայնքն ունի գործառույթներ, ուն ի պատվիրակված պարտականություններ: Այդ լիազորությունները պետք է իրականացվեն՝ կլինեն մշակութային, քաղաքաշինական, սոցիալական, տնտեսական, շինարարական, կառուցապատման, բարեկարգման և այլ միջոցառումներ: Դրանք ևս քաղաքապետի պարտադիր լիազորությունների մեջ են մտնում»,- «Արմենպրես»-ի հաղորդմամբ՝ ընդգծեց Արեյանը:

Դիտարկմանը, թե համայնքը պահանջում է սոցիալական խնդիրների լուծում, փողքաղաքապետը պատասխանեց. «Մենք ունենք սոցիալական բազմաթիվ ծրագրեր և քաղաքաշինության, և շինարարության, և բնակարանաշինության ոլորտում: Աղքատությունը գնահատվում է ընդհանուր սոցիալ-տնտեսական ցուցանիշների մեջ, իսկ քաղաքապետի և քաղաքապետարանի կողմից իրականացվող համայնքի բյուջեով նախատեսված ծախսերը միտված են սոցիալայան ոլորտում այն լիազորություններին, որոնք մենք պարտադիր իրականացնում ենք: Իսկ թվարկածս բոլոր ոլորտներում մենք անխուսափելիորեն ունենք ծախսեր: Մեկ բառ ով շատ հստակ ասեմ՝ քաղաքապետի և ավագանու լիազորությունները սահմանված են «Երևան քաղաքում տեղական ինքնակառավարման մասին» օրենքով: Այդ օրենքի բոլոր լիազորություններից չեք գտնի մի լիազորություն, որի ուղղությամբ մենք Երևանում ծախսեր չանենք»:

Երևանի քաղաքապետի առաջին տեղակալն անդրադարձավ նաև քաղաքապետարանի կողմից թանկարժեք կոնյակներ և բաժակներ գնելու մասին հրապարակումներին: Նա ընդգծեց, որ քաղաքապետարանը՝ որպես ինքնակառավարման մարմին, ունի նաև ներկայացուցչական ծախսեր, որոնք կարող են կապված լինել գործուղումների, ինչպես նաև պատվիրակությունների հյուրընկալության հետ: «Հետևաբար, այդ ծախսերը պարտադիր ծախսեր են: Դրանք թաքուն չեն արվել, արվել են բաց, հրապարակային, թափանցիկ: Այս ծախսերը նախապես ներառվում են բյուջեի նախագծում, իրազեկվում են Երևանի բնակիչները: Այդ ծախսեր ն անցնում  են քննարկումներ՝ հասարակական կազմակերպությունների մասնակցությամբ: Այնպես որ, այստեղ որևէ թաքուն բան չի արվել»,- ընդգծեց Արեյանը:

Նա հավելեց, որ տարվա ընթացքում լինում են տարբեր միջոցառումներ, հյուրընկալություններ, պատվիրակությունների ընդունում, հանդիպումներ: «Մենք հավուր պատշաճի մեր հյուրերին տրամադրում ենք նաև նվերներ, տրամադրում ենք կոնյակներ, տրամադրում ենք նաև այլ հուշանվերներ: Դա ընդունված բան է: Հյուրերը պետք է իմանան, որ իրենք այցելել են արժանապատիվ քաղաք, այցելել են Հայաստանի մայրաքաղաք, դրա համար մենք պետք է նրանց դիմավորենք ու ճանապարհենք հավուր պատշաճի: Յուրաքանչյուր հյուր իր քաղաքում հաստատ ունի բազմաթիվ խնդիրներ, սակայն այս ամենը ընդունվ ած բան է, որ մենք անում ենք»,- մանրամասնեց Կամո Արեյանը՝ հավելելով, որ Երևանի քաղաքապետարանը բոլոր հյուրերին ճանապարհում է նվերներով: