Լավրովի նախազգուշացումը դեսպաններին

Ռուսաստանն արդեն իսկ ջանքեր է գործադրում իր նախկին ազդեցության գոտիներ, մասնավորապես Հարավային Կովկաս վերադառնալու ուղղությամբ։ Երեկ տեղի է ունեցել Ռուսաստանի արտգործնախարար Սերգեյ Լավրովի և այդ երկրում հավատարմագրված մի շարք եվրասիական երկրների դիվանագիտական ներկայացուցչությունների ղեկավարների հանդիպումը, որին մասնակցել է նաև Ռուսաստանում Հայաստանի դեսպան Գուրգեն Արսենյանը։

Տարածված պաշտոնական հաղորդագրության համաձայն` Լավրովը սկզբունքային գնահատականներ է տվել Եվրասիայի տարբեր հատվածներում անվտանգության իրավիճակին, արձանագրել է եվրոատլանտյան անվտանգության հայեցակարգի ճգնաժամը, ուշադրություն հրավիրել ՆԱՏՕ-ի երկրների վտանգավոր գործողությունների վրա` ուղղված Ասիա-խաղաղօվկիանոսյան տարածաշրջանում իրավիճակի ապակայունացմանը, պայթյունավտանգ իրավիճակին Մերձավոր Արևելքում, ինչպես նաև Հարավային Կովկասի և Կենտրոնական Ասիայի կայունությանը սպառնացող ռիսկերին։

Ռուսական տարբեր աղբյուրների փոխանցմամբ, սակայն, Լավրովն այլ հարցերի վերաբերյալ է խոսել` ընդհուպ զգուշացնելով, որ Ուկրաինայում հարցերը կարգավորելուց անմիջապես հետո վերադառնալու է բոլոր այն տարածաշրջանները, որտեղից Արևմուտքի հովանավորությամբ գործող տարբեր կառավարություններ փորձել են դուրս դնել Ռուսաստանին։ Առաջին հերթին սա վերաբերում է հենց Հայաստանին, որի իշխանություններն արդեն տևական ժամանակ ամեն ինչ անում են ռուսական ազդեցությունը չեզոքացնելու և Հարավային Կովկասն արևմտյան ազդեցության գոտու վերածելու։

Ըստ տելեգրամյան ալիքների` Լավրովը բացահայտ Արսենյանին տեղեկացրել է, որ Հայաստանի իշխանությունների համար չափազանց վատ օրեր կարող են սկսվել, եթե Փաշինյանի գլխավորած իշխանությունն ի վերջո խելքի չգա։

Նունե Հովսեփյան