ԱՄՆ-ն չեղարկել է համակարգիչների և սմարթֆոնների մաքսատուրքերը

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

ԱՄՆ նախագահ Դոնալդ Թրամփի վարչակազմը սմարթֆոնները, համակարգիչները և էլեկտրոնիկայի այլ ապրանքներն ազատել է փոխադարձ առևտրային մաքսատուրքերից։ Դա վերաբերում է նաև չինական մատակարարումներին, որոնց վրա ավելի վաղ 145 տոկոս մաքսատուրք էր դրվել, հայտնում է Bloomberg-ը՝ վկայակոչելով ԱՄՆ մաքսային և սահմանապահ ծառայության տվյալները։

Թրամփի «առևտրային պատերազմի» շրջանակում մաքսատուրքերի ենթակա ապրանքների ցանկից բացառվել են սմարթֆոնները, նոութբուքերը, կոշտ սկավառակները, հիշողության չիփերը, համակարգչային պրոցեսորները և կիսահաղորդիչների արտադրության մեքենաները, որոնց մեծ մասը Միացյալ Նահանգները ներմուծում է։ CNBC-ն ավելացնում է, որ մաքսատուրքերը հանվել են նաև արևային մարտկոցների, հեռուստացույցների հարթ դիսփլեյների, ֆլեշ կուտակիչների և հիշողության քարտերի վրայից։

Bloomberg-ը նշում է, որ այս միջոցառումը կօգնի խուսափել ամերիկյան սպառողների համար «ցնցող գների աճից» և օգուտ կբերի էլեկտրոնիկայի այնպիսի ընկերությունների, ինչպիսիք են Apple-ը, Samsung-ը և Taiwan Semiconductor Manufacturing-ը:

Այդուհանդերձ, մաքսատուրքերի մասնակի վերացումը կարող է ժամանակավոր քայլ լինել։ Դա արվել է «կրկնակի հարկումից» խուսափելու համար, պարզաբանում է գործակալությունը։ Խնդիրն այն է, որ մի շարք ապրանքներ կարող են միաժամանակ ընկնել և՛ ինչ-որ երկրի «համազգային մաքսատուրքի», և՛  լրացուցիչ ոլորտային (էլեկտրոնիկայի) 25% մաքսատուրքի տակ:

Հավանական է, որ ավելի ուշ որոշ ապրանքների համար կներդրվի առանձին, ավելի ցածր սակագին։ Դա կանդրադառնա, մասնավորապես, կիսահաղորդիչների վրա, որոնց համար Թրամփը նախկինում խոստացել էր հատուկ հարկ մտցնել, բայց առայժմ չի արել։