Մոսկվան նոր կուրատորներ է նշանակել հայկական ուղղությամբ

Մամուլում վերջերս հայտնի դարձավ, որ Հայաստանի գծով կուրատորը Ռուսաստանի իշխանությունում փոխվել է, այժմ Հայաստանի ուղղությունը համակարգելու է Պուտինի աշխատակազմի ղեկավարի առաջին տեղակալ, նախկին վարչապետ Սերգեյ Կիրիենկոն։

Ընդհանուր առմամբ դա բավականին հատկանշական ու սիմվոլիկ նշանակություն ունի, որովհետև Կիրիենկոն համարվում է Պուտինի ամենավստահելի և հարգված կողմնակիցներից մեկը, սովորաբար նրան են հանձնարարում ամենակարևոր ուղղությունները։ Եվ այժմ նրա նշանակումը վկայում է, որ հայաստանյան ուղղությունը լրջացել է Կրեմլի համար։ Նաև Մոսկվայում դժգոհ են նախկին համակարգողից, քանի որ Հայաստանը փաստացի դուրս է եկել Մոսկվայի վերահսկողությունից, ընդհուպ վերածվել է ոչ բարեկամական պետության։ Թեպետ Կրեմլի խոսույթում Հայաստանը դեռ ԵԱՏՄ, ՀԱՊԿ անդամ ու ռազմավարական դաշնակից է, փաստ է՝ որ պաշտոնական Երևանի նկատմամբ ընդգծված բացասական վերաբերմունք կա։

Այժմ Կիրիենկոյին բարդ աշխատանք է սպասվում, ի տարբերություն նախորդների, որոնք սերտ կապեր ունեին Հաաստանի իշխանությունների, օլիգարխների հետ, թաթախված էին կոռուպցիոն գործարքներում, Կրեմլին կեղծ կամ կիսատ տեղեկություններ էին փոխանցում, Կիրիենկոն տեղեկությունները ստանում է այլ, մի քանի տարբեր աղբյուրներից, այդ թվում՝ վերլուծական կենտրոններից, էքսպերտային հասարակությունից, բնականաբար, համադրում է իրար և հատուկ ծառայություններին հանձնարարականներ տալիս։

Նախկինում հայկական ուղղությունը համակարգում էր նաև ՌԴ Արտաքին հետախուզության ծառայությունը, որին ևս քննադատում էին իր գործը ձախողելու մեջ, ընդ որում՝ ոչ միայն Հայաստանում, այլև Ուկրաինայում և Մոլդովայում։ Այժմ այն փոխանցվել է Անվտանգության դաշնային ծառայությանը։ Զգալիորեն նվազել է ՌԴ ԱԳՆ դերը, քանի որ Լավրովն էլ անվստահելիի համբավ է ձեռքբերել։ Փաշինյանի իշխանությունը տեղյակ է նոր զարգացումներից, ըստ աղբյուրների՝ բավական մտահոգ է:

Անիտա Ոսկանյան