«Նոր սերունդը կանաչ է, խակ է…». Հրաչյա Քոչարի հիշատակի օրն է․ գրողի հայտնի մտքերը

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Մայիսի 2-ը հայ արձակագիր, հրապարակախոս, ՀԽՍՀ պետական մրցանակի առաջին դափնեկիր, ԽՍՀՄ գրողների միության անդամ Հրաչյա Գաբրիելյանի՝ Հրաչյա Քոչարի հիշատակի օրն է։

ArmLur.am-ը ներկայացնում է գրողի կյանքն ու հետաքրքիր մտքերը։

Հայրենական մեծ պատերազմի մասնակիցն իրեն գրական անուն է դարձրել հոր՝ Քոչար Գաբրիելյանի անունը։

Ծնվել է Արևմտյան Հայաստանի Բագրևանդ գավառի Գումլուպուճախ գյուղում, որը գտնվում է Նպատ լեռան ստորոտին։ Գաղթի ճանապարհին մահացել է մայրը, 1918 թվականին՝ հայրը՝ հայտնի խմբապետ Քոչոն, ով կռվել է Անդրանիկի ջոկատում։ Փրկվելով թուրքերի կողմից իրականացրած կոտորածներից՝ համագյուղացիների հետ անցել է Արևելյան Հայաստան։ Եղել է գառնարած, հանքափոր Ալավերդու հանքերում։ Այնուհետև տեղափոխվել է Երևան, ընդունվել Երևանի պետական համալսարանի բանասիրական ֆակուլտետ։

Հայ ճանաչված ու մեծանուն նկարիչ Մարտիրոս Սարյանը Հրաչյա Քոչարին տեղավորել է իր ղեկավարած Պատմական հուշարձանների պահպանության կոմիտեում։ Ոտքով շրջել ու ուսումնասիրել է հայկական վանքերի ու մատուռների վիճակը և այդ աշխատանքներն ամփոփել «Գորիսի և Սիսիանի շրջանների ալբոմ-ուղեցույցի» մեջ։ 1941-1945 թվականներին ծառայել է ԽՍՀՄ բանակում, մասնակցել Երկրորդ համաշխարհային պատերազմին։

Քոչարը հետագայում արժանացել է մրցանակների՝ «Կարմիր աստղ» շքանշանի և ՀԽՍՀ պետական մրցանակի՝ «Նահապետ» վիպակի համար։

Նշենք, որ Քոչարի անունով կա նաև փողոց Երևանում՝ Արաբկիր վարչական շրջանում, որը սկսվում է Բարեկամության հրապարակից և հասնում մինչև Նաիրի Զարյան փողոց։

Նաև նշենք գրողի հայտնի ու գեղեցիկ մտքերը։

1․ Աշխարհում ոչ մի գաղտնիք գաղտնիք չի մնում…

2․ Կարոտը թոնրի մոխիրի տակ մնացած անթեղ կրակ է..Անթեղ կրակը չի մարի… կարոտն էլ չի մարի կրակի պես…

3․ Նոր սերունդը կանաչ է, խակ է, քանի դեռ կանաչ է` արմատն էլ թաց է, որ հասնի կարմրի` կծարավնա…Կարոտը կրակ է, ծարավ է..․

4․ Մեղքը զոռով գալիս փաթաթվում է մարդու վզին, պետք է զգույշ լինես, հեռու փախչես փորձանքից:

5․ Մահվանից էն կողմ ոչ չարչարանք կա, ոչ ահ ու սարսափ…

6․ Երբ հոգեառ հրեշտակներին ինքդ ես կանչում` չեն գալիս, երբ չես կանչում ` էն ժամանակ գալիս են:

Աննա Սրապիոնյան

Հետևեք մեզ՝ այստեղ