Մորաքույր Մարիան, կղզուց փախուստն ու սրճային լիկյորի բաղադրատոմսը. «Փաստ»

«Փաստ» օրաթերթը գրում է.

Tia Maria կոչվող լիկյորը, որը թարգմանվում է որպես Մորաքույր Մարիա, այսօր ժողովրդականություն է ձեռք բերել իր հայրենիքից՝ Ջամայկայից էլ շատ հեռու: Այն հայտնի է ինչպես Ամերիկյան մայրցամաքներում, այնպես էլ Եվրոպայում: Այդ սև-շագանակագույն ըմպելիքն ունի սուրճի և վանիլի նուրբ բույր, ինչպես նաև քաղցր համ՝ երկար հետհամով:Այդ յուրահատուկ լիկյորը պատրաստելու համար ջամայկացիներն օգտագործում են շատ թանկ սուրճի հատիկներ, որոնք աճեցվում են լեռներում, հինգ տարվա հնեցման մուգ ռոմ, եղեգնաշաքար և տարբեր համեմունքներ։ Մեր օրերում այդ լիկյորի ալկոհոլի պարունակությունը կազմում է 26,5 % (ի սկզբանե լիկյորի թնդությունը կազմում էր 31,5 %)։

Թիա Մարիան դարավոր պատմություն ունի։ Մասնավորապես, խմիչքի ծագման հարցում պատմվում է մի գեղեցիկ լեգենդ գաղութարարների և Իսպանիայից եկած մի գեղեցիկ ազնվականուհու մասին։ Ամեն ինչ սկսվել է 17-րդ դարում՝ այն ժամանակ, երբ ծովերը պատկանում էին ծովահեններին, և կար մշտական ռազմական առճակատում եվրոպական ծովային տերությունների միջև: Ջամայկա կղզում մի երիտասարդ իսպանուհի կառավարում էր բազմաթիվ պլանտացիաներից մեկը, և հերթական ռազմական հակամարտության ժամանակ նա և իր սպասուհի Մարիան ստիպված էին փախչել կղզուց: Չիմանալով, թե ինչպես շնորհակալություն հայտնել տիրուհուն՝ իրեն փրկելու համար, Մարիան նրան տալիս է իր ունեցած միակ արժեքավոր բանը՝ անսովոր լիկյորի բաղադրատոմսը: Ավելի ուշ տիրուհին այդ լիկյորն անվանել է հենց Մարիայի պատվին։

Գեղեցիկ լեգենդ է, բայց, ինչպես հաճախ է պատահում, կա ավելի առօրեական պատմություն: Եվ դա վերաբերում է մեզանից ոչ այնքան հեռու ժամանակներին։ Երկրորդ համաշխարհային պատերազմի ավարտից հետո Ջամայկայում բնակվող Քեննեթ Էվանսն է լիկյորի բաղադրատոմս հորինել, որը հիմնված էր ռոմի և սուրճի հատիկների վրա, և տեղում էլ կազմակերպել է դրա արտադրությունը։ Չնայած սա խմիչքի ծագման պաշտոնական պատմությունն է, բայց կան որոշ անհամապատասխանություններ: Մասնավորապես, կան փաստաթղթեր, որոնք վկայում են այն մասին, որ Tia Maria International Limited ընկերությունը գրանցված է եղել դեռ 1929 թվականին։ Այնուամենայնիվ, Մորաքույր Մարիա լիկյորը գոյություն ունի, և դրա ծագման վերաբերյալ որոշ հարցեր միայն խթանում են ալկոհոլային խմիչքների սիրահարների հետաքրքրությունը:

Հարկ է նշել, որ Թիա Մարիայի համը բավականին տարբերվում է սուրճի այլ լիկյորներից: Նախ՝ այն նկատելիորեն ավելի քաղցր է և ավելի քիչ խիտ: Երկրորդ՝ Մորաքույր Մարիայի համն ավելի բարդ է և ներդաշնակ համեմունքների շնորհիվ, ինչը թույլ է տալիս այն օգտագործել որպես առանձին ըմպելիք, այլ ոչ միայն օգտագործել կոկտեյլներում։ Այն հիանալի է համադրվում նաև շոկոլադե աղանդերների և պաղպաղակի հետ:

ԿԱՄՈ ԽԱՉԻԿՅԱՆ

Մանրամասները՝ «Փաստ» օրաթերթի այսօրվա համարում