Փաշինյանի՝ իշխանությունը պահպանելու հիմնական քաղաքական ռեսուրսը առճակատումն է. «Փաստ»

«Փաստ» օրաթերթը գրում է.

svpressa.ru-ն «Վերածվում է Զելենսկու. արևելագետը բացատրել է, թե ուր է Հայաստանը տանում Փաշինյանը» վերնագրով հոդվածում գրում է, որ լրատվամիջոցին տված հարցազրույցում արևելագետ Ստանիսլավ Տարասովն ասել է, թե Հայաստանը սկսում է դուրս մնալ ոչ միայն մեծ համաշխարհային քաղաքականության համատեքստից, այլև նույնիսկ տարածաշրջանային քաղաքականությունից։

«Մենք գիտենք, որ ընդդիմությունը պարբերաբար դժգոհություն է հայտնում և կազմակերպում է հանրային բողոքի ցույցեր: Երկրում հասարակությունն, իհարկե, բաժանված է: Մինչ այժմ համամասնությունները Փաշինյանի օգտին են, բայց դրանք շատ աննշան են: Հայաստանը վերածվում է երրորդ կարգի երկրի և սկսում է դուրս մնալ ոչ միայն համաշխարհային մեծ, այլ նաև տարածաշրջանային քաղաքականությունից: Ուշադրություն դարձրեք նրան, թե ինչպիսի լարված, փոթորկալից արտաքին քաղաքական կյանքով է ապրում Վրաստանը, ինչպես է Ադրբեջանը վարում իր քաղաքականությունը: Իլհամ Ալիևը այցելում է Չինաստան, փորձում է միջնորդի դեր ստանձնել Թուրքիայի, Սիրիայի և Իսրայելի հաշտեցման գործում: Իսկ ի՞նչ կարելի է ասել Հայաստանի մասին: Նա խոսում էր «Զանգեզուրի միջանցքի» մասին, և հիմա չի կարողանում «վաճառել» անգամ այդ թեման», - բացատրել է Տարասովը:

Արևելագետը ընդգծել է, որ հայերը հավակնություններ ունեցող ժողովուրդ են և կարողացել են պահպանել իրենց ինքնությունն ու պետականությունը երկար պատմության ընթացքում։ Երկրի քաղաքացիների մեծամասնությունը, իսկապես, ապրում է տրավմայի շրջան Ղարաբաղի կորստից հետո, և հենց այդ պահին էլ Փաշինյանը խաղադրույք է կատարում ոչ թե ապացուցված պատմական դաշնակցի և գործընկերոջ, այլ Արևմուտքի վրա, որը Հայաստանը դիտարկում է միայն որպես տարածաշրջանում իր դիրքերը ամրապնդելու գործիք։ «Հայերը, իհարկե, անհանգստացած են։ Նրանք քաղաքականապես բավականին գրագետ են, լավատեղյակ համաշխարհային քաղաքականության ներկայիս վիճակին, կրթված և զգում են, որ ինչոր բան այն չէ, և երկիրը սխալ ուղղությամբ է գնում։ Փաշինյանը խաղում է առճակատման վրա։ Գիտեք, նա դարձել է Զելենսկու նման, վերածվել է այնպիսի կերպարի, ինչպիսին, գուցե, Նեթանյահուն է։ Նրա իշխանությունը պահպանելու հիմնական քաղաքական ռեսուրսը առճակատումն է։ Ցանկացած այլ իրավիճակում նա կհեռացվի իշխանությունից», - եզրափակել է Տարասովը։

Մանրամասները՝ «Փաստ» օրաթերթի այսօրվա համարում