Նիշանյանի փաստաբանը բողոքարկել է մտավորականին փակ ռեժիմի բանտ տեղափոխելու որոշումը

Պոլսահայ մտավորական, լեզվաբան Սևան Նիշանյանի փաստաբան Մուրաթ Աքչըն բողոքարկել է իր պաշտպանյալին փակ ռեժիմի բանտ տեղափոխելու մասին դատարանի որոշումը: Ինչպես հաղորդում է «Արմենպրես»-ը, այս մասին Ստամբուլի հայկական «Ակոս» պարբերականին հայտնել է փաստաբանը:

Բանտի ղեկավարությունից հայտնել են, որ Նիշանյանին փակ ռեժիմի բանտ տեղափոխել են բանտային կանոնները խախտելու պատճառով:

«Բողոքարկման գործընթացը մի քանի ամիս կտևի: Այդ ընթացքում Նիշանյանը կշարունակի մնալ բանտի փակ ռեժիմի հատվածում»,- հայտնել է Աքչըն: Նա տեղեկացրել է նաև, որ իր պաշտպանյալին փակ ռեժիմի բանտ տեղափոխելով` զգալիորեն վնաս կհասցվի Նիշանյանի կողմից բանտարկվելուց հետո այդտեղ իրականացվող բառարանային աշխատանքին:

2014 թվականի հունվարից 11 տարի ժամկետով ազատազրկման մեջ գտնվող Սևան Նիշանյանը Թուրքիայում ձերբակալվել է այն բանի համար, որ օրենքով իրեն պատկանող տարածքում «ապօրինի» շինարարություն է կատարել: Թուրքական մամուլն ավելի վաղ հայտնել է, որ Սևան Նիշանյանի ձերբակալությունը իշխանությունների սարքած գործն է, քանի որ մտավորականը բազմիցս հանդես էլ եկել թուրքական կառավարության բացերի հրապարակային քննադատությամբ: Նա նաև Թուրքիայում մշտապես բարձրաձայնել է Հայոց ցեղասպանության իրողության մասին:

Նիշանյանը 2015 թվականի սեպտեմբերի 24-ին տեղափոխվել էր Սուլթանհիսարի բաց ռեժիմի բանտ, որտեղ պայմանները բանտարկյալների համար համեմատաբար ավելի մեղմ են: Սակայն 2016 թվականի հունվարին լեզվաբանը կրկին տեղափոխվել է նույն բանտի փակ ռեժիմի հատված: