Այս տարվա փետրվարի 5-ին Նար-Դոսի 73 հասցեի բակում զենքով վնասվածք հասցնելու դեպքով որոշում է կայացվել, կան կալանավորվածներ:
Ինչպես հայտնի է 2025 թվականի Փետրվարի 5-ին արտակարգ դեպք էր տեղի ունեցել Երևանում։ Ժամը 23:15-ի սահմաններում ՀՀ Ներքին գործերի նախարարության Ոստիկանության քրեական ոստիկանության գլխավոր վարչության Երևանի քրեական վարչությունում և ՀՀ ՆԳՆ Ոստիկանության համայնքային ոստիկանության գլխավոր վարչության Մարաշի բաժնում օպերատիվ տեղեկություններ են ստացվել, որ Նար-Դոսի 73 հասցեի բակում ծեծկռտուք է:
Քրեական և համայնքային ոստիկանները նշված շենքի բակում՝ երկաթյա սյանը հարվածած վիճակում հայտնաբերել են «Lada Priora» մակնիշի ավտոմեքենա՝ դիմապակին և հետևի աջ կողային ապակին վնասված վիճակում, թափքը նույնպես ամբողջությամբ վնասված։ Իսկ այդ ավտոմեքենայից մոտ 100-150 մետր հեռավորության վրա հայտնաբերվել են արնանման հետքեր։
Ոստիկանները պարզել են, որ «Lada Priora»-ն պատկանում է Երևանում հաշվառված 22-ամյա Վլադիմիր Գասպարյանին։
Արդյունքում, Նար-Դոս փողոցի աղմկահարույց միջադեպով մեղադրանք է առաջադրվել
Արման Արայիկի Խաչատրյանին, որ նա Արման Դավիթի Աղեկյանի և դեռևս ինքնությունները չպարզված անձանց հետ խմբի կազմում, 2025թ․ փետրվարի 5-ին ժամը 23։15-ի սահմաններում, Երևան քաղաքի Նար-Դոս փողոցի 73 և 73Ա շենքերի միջանկյալ բակային հատվածում, զենքի և մարմնական վնասվածք պատճառելու համար նախապես պատրաստված առարկայի գործադրմամբ կատարել է խուլիգանություն։
Վերոնշյալ երիտասարդները կալանավորված են։
Քնար Մանուկյան
