ՊԱՏՄՈՒԹՅԱՆ ԱՅՍ ՕՐԸ (7 ՀՈՒՆԻՍԻ). Առաջին Ձմեռային պալատը, Նոր աշխարհի գաղութացման տարածքների բաժանումը, Վատիկան պետության ստեղծումը. «Փաստ»

«Փաստ» օրաթերթը գրում է.

ՏՈՆԵՐ ԵՎ ՀԻՇԱՐԺԱՆ ՕՐԵՐ

Դանիա՝ Իոախիմ թագաժառանգի ծննդյան օր, Իսպանիա՝ Հանրապետության օր, Մալթա՝ Տառապյալների օր, Նորվեգիա՝ Անկախության օր, Պերու՝ Դրոշի օր:

ՀԱՅ-ՀԱՅԱՍՏԱՆ

1683– ծնվել է բանաստեղծ, երաժիշտ, գիտնական, հրատարակիչ, ազգային և կրթական լուսավորման շարժման գործիչ Պաղտասար Դպիրը։

1724- թուրքական ստվար բանակը գրավել է Երևանը:

1879-ծնվել է բանասեր և հայագետ Արշակ Ալպոյաջյանը:

1917-ծնվել է խորհրդահայ փորձարկող օդաչու Անդրեյ Մանուչարովը:

1923- Կավբյուրոյի նիստում Հայաստանի ղեկավարության և արցախահայության հաստատակամ ու հետևողական ջանքերի շնորհիվ Ադրբեջանի իշխանությունները, ստիպված ԼՂ-ն անջատելով դաշտային մասից, կազմել են Լեռնային Ղարաբաղի Ինքնավար Մարզը (ԼՂԻՄ)։ Բացի դա, նիստում ընդունվել է որոշում վիճելի համարվող հայկական ու հայաբնակ Ախալքալաքի ու Ծալկայի (Խրամի) պատկանելության հարցը թողնել Վրաստանի կոմկուսի կենտկոմի հայեցողությանը, իսկ Լոռու «չեզոք գոտին» թողնել Հայաստանի կազմում։

1945-ԽՍՀՄ արտգործնախարար Մոլոտովը Մոսկվայում թուրքական դեսպանի հետ հանդիպմանը պահանջել է վերանայել թուրք-խորհրդային սահմանը, հետագայում այդ պահանջը հիմնավորելու նպատակով իրականացվել է ՀԽՍՀ բնակչության քանակի ավելացում՝ արտասահմանից հայերի ներգաղթ իրականացնելու միջոցով։

1959-ծնվել է քաղաքական գործիչ Ստեփան Դեմիրճյանը: 1987-վախճանվել է գեներալ-մայոր Հմայակ Հախնազարյանը:

2004- «Զվարթնոց» օդանավակայանում հանդիսավորությամբ սկսվել է նոր ուղևորատար համալիրի շինարարությունը:

2005- Փարիզի մերձակայքում գտնվող Պլեսի-Ռոբենսոն քաղաքի կենտրոնական զբոսայգում հանդիսավորությամբ բացվել է զորավար Անդրանիկի արձանը։

2007-Հայաստանի նախագահ Ռոբերտ Քոչարյանը Հայաստանի վարչապետ է նշանակել Սերժ Սարգսյանին, իսկ Ազգային ժողովի առաջին նիստում փակ, գաղտնի քվեարկությամբ խորհրդարանի նախագահ է ընտրվել Տիգրան Թորոսյանը:

2012– վախճանվել է փայտի վրա փորագրող վարպետ Արսեն Փանոսյանը:

2015-Հայաստանի 32 համայնքում տեղի են ունեցել ՏԻՄ ընտրություններ:

2016-մշակույթի նախարարի հրամանով Ալեքսանդր Սպենդիարյանի անվան ազգային ակադեմիական օպերայի և բալետի թատրոնի նոր գեղարվեստական ղեկավար է նշանակվել ամերիկահայ անվանի դաշնակահար, դիրիժոր Կոնստանտին Օրբելյանը:

2018- Նիկոլ Փաշինյանի կառավարության ծրագրին խորհրդարանը հավանություն է տվել ձայների 62 կողմ, 39 դեմ հարաբերակցությամբ:

2019- ոստիկանությունը տասնյակ մարդկանց է բերման ենթարկել, ինչպես Փաշինյանն էր հանձնարարել՝ ոչ թե թավշյա, այլ երկաթյա մեթոդներով՝ ասֆալտին պառկեցնելով ու թևեր ոլորելով։

2021- Հայաստանում մեկնարկել է խորհրդարանական ընտրությունների նախընտրական քարոզարշավը:

ԱՇԽԱՐՀ

1099– Խաչակրաց առաջին արշավանքի ժամանակ սկսվել է Երուսաղեմի պաշարումը։

1340-Հոլանդիայում հիմնադրվել է Ռոտերդամ քաղաքը:

1494– Իսպանիան և Պորտուգալիան «Տորդեսիլյասի պայմանագրով» բաժանել են Նոր աշխարհի գաղութացման տարածքները։

1498-Կոլումբոսն սկսել է իր երրորդ ծովային ճանապարհորդությունը:

1654-թագադրվել է Ֆրանսիայի թագավոր Լյուդովիկոս 14-րդը:

1692-Յամայկայում տեղի ունեցած երկրաշարժի հետևանքով առաջացած ցունամին քշել, տարել է Կարիբյան ծովում գտնվող ծովահենների գլխավոր Պորտ-Ռոյալ քաղաքը, սկսվել է Վեստ-Ինդիայում ծովահենության դարաշրջանի անկումը:

1732-Ռուսաստանի թագուհի Աննա Իոհանովնայի համար սկսել են կառուցել առաջին Ձմեռային պալատը:

1775-Միացյալ Գաղութները փոխել է իր անունը՝ Միացյալ Նահանգներ:

1776- Նյու Յորքից բացի, մնացած անգլիական գաղութները քվեարկել են անկախության օգտին:

1848-ծնվել է ֆրանսիացի գեղանկարիչ, գրաֆիկ, քանդակագործ, հետիմպրեսիոնիստ Պոլ Գոգենը:

1880–Խաղաղօվկիանոսյան երկրորդ պատերազմի ժամանակ Չիլիում տեղի է ունեցել Արիկայի ճակատամարտը։

1903-Բեռլինում ֆրանսիացի գիտնական Պիեռ Կյուրին հայտարարել է նոր քիմիական էլեմենտի՝ պոլոնիումի հայտնագործման մասին:

1929-համաձայն Լատերիանական համաձայնագրի, ստեղծվել է Վատիկան պետությունը:

1942-ծնվել է լիբիական քաղաքական և ռազմական գործիչ Մուամար Կադդաֆին:

1965-Sony կորպորացիան ներկայացրել է առաջին տնային վիդեոմագնիտոֆոնը, որի արժեքը եղել է 995 դոլար:

1981– իսրայելական օդուժն իրականացրել է «Օպերա» գործողությունը՝ լուրջ վնաս հասցնելով Իրաքի տարածքում գտնվող ֆրանսիական արտադրության «Օսիրակ» ատոմային ռեակտորին։

1982–Էլվիս Փրեսլիին պատկանող «Գրեյսլենդ» ագարակը, որը գտնվում է Թենեսի նահանգում, բացվել է որպես թանգարան։

1990 – ծնվել է ավստրալացի ռեփեր և մոդել Իգի Ազալիան։

Մանրամասները՝ «Փաստ» օրաթերթի այսօրվա համարում