Էս պահին ես իմ միջոցներով արագ ամեն ինչ տրամադրելու եմ, որ շուտ վերականգնենք․ Ապարանի քաղաքապետ

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Ապարանում երեկվա հզոր տորնադոյից հետո էլեկտրականությունն ու գազամատակարարումը դեռ չի վերականգնվել, հույս ունեն, որ այսօրվա ընթացքում գոնե կվերականգնեն։

Այս մասին MediaHub-ի հետ զրույցում ասաց Ապարանի համայնքապետ Կարեն Եղիազարյանը։ Հիշեցնենք, երեկվա հզոր փոթորիկը Ապարան համայնքում քշել էր տասնյակ տների տանիքներ, տապալել էլեկտրասյուներ, պոկել էլեկտրահաղորդման լարերն ու գազի խողովակները՝ բնակչությանը զրկելով գազից և հոսանքից։

«Երեկվանից վերականգնման աշխատանքներն ընթանում են, թե՛ ՀԷՑ-ը, թե՛ փրկարարները աշխատում են, փորձում ենք այսօր մինչև ժամը 5-6-ը գազի ու լույսի հարցը լուծել, տանիքների շինարարական աշխատանքներն էլ արդեն սկսել ենք»,- ասաց Կարեն Եղիազարյանը։

-Մինչև լույս աշխատե՞լ են այնտեղ՝ փրկարարները, մյուսները։

-Բոլորը, բոլորը, ոչ մեկս տուն չենք գնացել, մինչև լույս աշխատել ենք։ Իհարկե, ինչ-որ պահի նույն ինտենսիվությամբ չենք աշխատել, երբ դուք էստեղ էիք, որովհետև մութ էր արդեն, բայց աշխատել ենք։

-Իսկ վնասների մասով ի՞նչ կարող եք ասել, արդեն կա՞ որոշակի հստակություն, թե որքան վնաս է կրել քաղաքը։

-Չէ, դեռ հստակ բան չկա։ 

-Իսկ ի՞նչ միջոցներով եք տանիքների վերանորոգումը սկսելու։

-Ես վստահ եմ, որ կառավարությունը աջակցելու է, բայց էս պահին ես իմ միջոցներով արագ ամեն ինչ տրամադրելու եմ, որ շուտ վերականգնենք, մինչև էս իրավիճակից դուրս գանք։ Բայց գիտենք, որ կառավարությունը զբաղվում է, բոլորիս էլ պարզ է, որ դա նույն րոպեին չի լուծվի, դրա համար մենք քաջ գիտակցում ենք, որ էս րոպեին էս լուծումը պիտի տրվի, որ ժողովուրդը չմնա առանց տանիքի։