Գեղարքունիքում կշարունակվեն խմելու ջրի մատակարարման համակարգերի բարելավման եւ նորացման ծրագրերը

Գեղարքունիքի մարզում առաջիկա տարիներին «Հայջրմուղկոյուղի» ՓԲԸ պատվիրատվությամբ կշարունակվեն խմելու ջրի մատակարարման եւ ջրահեռացման համակարգերի բարելավման եւ նորացման ծրագրերը, որոնց իրականացման համար ներդրվող գումարը կկազմի մինչեւ 200 միլիոն ԱՄՆ դոլարին համարժեք դրամ: «Արմենպրես»-ի տեղեկացմամբ` այս մասին Գեղարքունիքի մարզպետարանում հրավիրված հանդիպման ժամանակ հայտարար եց «Հայջրմուղկոյուղի» ՓԲԸ գործադիր տնօրեն Պատրիկ Լորենը:

Բացելով հանդիպումը` Գեղարքունիքի մարզպետ Ռաֆիկ Գրիգորյանը նշեց, որ վերջին շրջանում մարզի համայնքներում «Հայջրմուղկոյուղի» ՓԲԸ պատվիրատվությամբ  իրականացվող  աշխատանքների ընթացքը դանդաղել է ջրամատակարման ոլորտում սպասարկում իրականացնող կազմակերպությունում սպասվող կառուցվածքային փոփոխության հետեւանքով, եւ հրավիրված հանդիպման հիմնական նպատակն է` համատեղ քննարկել առաջիկա հրատապ անելիքները, հստակեցնել հետագա քայլերը:

«Մինչեւ կառուցվածքային փոփոխությունների գործընթացի ավարտը, մինչեւ սպասարկող օպերատորի ընտրությունը մենք պետք է հաստակեցնենք մեր հետագա անելիքները, հասկանանք, թե ինչ առաջնահերթ խնդիրներ ունենք լուծելու:Մինչ այժմ «Հայջրմուղկոյուղու» հետ հաստատված արդյունավետ համագործակցությունը հիմք է տալիս համոզվելու, որ առաջիկա տարիներին եւս մենք կկարողանանք լուծել մեր առջեւ դրված բոլոր խնդիրները` շուրջօրյա կայուն ջրամատակարարում ապահովելով մարզի բոլոր համայնքներում»,-նշեց մարզպետ Ռաֆիկ Գրիգորյանը:

«Հայջրմուղկոյուղի ՓԲԸ տնօրեն Պատրիկ Լորենն իր խոսքում հավաստեց, որ Գեղարքունիքի ջրամատակարարման համակարգերի բարելավման  ուղղությամբ ներդրումները կշարունակվեն, կշարունակվի նաեւ հաստատված  համագործակցությունը Գեղարքունիքի մարզպետարանի եւ մարզի համայնքների տեղական ինքնակառավարման մարմինների հետ:

«2016-2018 թվականներին Գեղարքունիքի մարզի համայնքների խմելու ջրի մատակարարման եւ ջրահեռացման համակարգերի նորացման համար նախատեսվող ներդրումը կազմելու է 9 միլիոն 200 հազար եւրո: 2016 թվականի ընթացքում  վարկային ծրագրում ընդգրկված բոլոր համայնքներում կիրականացվեն նախագծման աշխատանքներ, իսկ շինարարական աշխատանքները կսկսվեն 2017 թվականի գարնանից:

Առաջիկա հինգ տարիների ընթացքում խմելու ջրի մատակարարման եւ ջրահեռացման համակարգերի վարկային ներդրումները Գեղարքունիքի  մարզում կկազմեն մինչեւ 200 հազար դոլար: Ջրամատակարարման եւ ջրահեռացման խնդիրները կլուծվեն տարեցտարի, փուլ առ փուլ, միայն թե համբերել է պետք: Իսկ մինչեւ շինարարական աշխատանքների սկիզբը մենք պետք է լուծենք ընթացիկ խնդիրները, շարունակենք մեր միջեւ հաստատված գործնական ու բարեկամական հարաբերությունները»,-նշեց Պատրիկ Լորենը:

Հանդիպման ընթացքում իրենց համայնքներում կուտակված ջրամատակարարման եւ ջրահեռացման խնդիրներն ու դրանց լուծման տարբերակներն առաջ քաշեցին Սարուխանի, Գանձակի, Կարմիրգյուղի, Լճափի, Ներքին Գետաշենի, Ծաղկաշենի, Ծաղկունքի,Դդմաշենի, Ծովագյուղի, Շատվանի, Գեղհովիտի, Ջիլի, Ճամբարակի համայնքների ղեկավարները: Առաջնահերթ լուծման ենթակա  խնդիրների մեջ ընդգրկվեցին Ներքին Գետաշենի որոշ թաղամասերի ջրամատակարարման ապահովման, ներքին ցանցի վերակառուցման, Ծաղկունքի ջրատարի  մաքրման կայանի վերջնական շահագործման եւ ներքին ցանցի վերակառուցման, Ծո վագյուղում 300 բաժանորդների բնակարաններում ջրաչափերի տեղադրման, Շատվանի արտաքին եւ ներքին ջրատար ցանցերը «Հայջրմուղկոյուղի» ՓԲԸ սպասարկման ոլորտում ընդգրկելու  հետ կապված եւ մի շարք այլ հիմնահարցեր:

Ընթացիկ հարցերի լուծման, ինչպես նաեւ համայքների ջրամատակարարման համակարգերի նորացման նախագծանախահաշվային փաստաթղթերի կազմման մեկնարկը կտրվի մարտի վերջերին կամ ապրիլի սկզբներին` ձնածածկույթի վերացումից հետո:

Խոսրով Խլղաթյան