Ռուսական արվեստի թանգարանում նորաձևությունն ու արվեստը միավորվում են՝ նոր խոսք բերելով մշակույթի հանրահռչակմանը

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Ռուսական արվեստի թանգարանում (պրոֆեսոր Ա. Աբրահամյանի հավաքածու) տեղի ունեցավ հանճարեղ նկարիչ, ռուսական մոդեռնի հիմնադիր Միխայիլ Վռուբելի «Դևն ու Հրեշտակը Թամարի հոգու հետ» գլուխգործոցի բացառիկ ցուցադրությունը։ Միջոցառման ընթացքում ստորագրվեց եռակողմ հուշագիր Ռուսական արվեստի թանգարանի, «Մշակույթի զարգացման» հիմնադրամի և Moment of White բրենդի միջև։

Նախաձեռնությունը համագործակցության նոր հարթակ է, որտեղ նորաձևությունն ու կերպարվեստը դառնում են մշակութային երկխոսության լեզու։ Կողմերի  համագործակցությունն իրականանում է թանգարանում պահվող ցուցանմուշների հիման վրա հագուստի հեղինակային հավաքածու ստեղծելու ուղղությամբ՝ արվեստը ներկայացնելով ժամանակակից դիզայնի միջոցով։ Վռուբելի նշանավոր աշխատանքը՝ իր հոգևոր և գեղագիտական խորությամբ, կլինի նոր հավաքածուի ոգեշնչման աղբյուրներից մեկը։ 

«Մենք մշտապես փնտրում ենք նոր ուղիներ թանգարանային մշակույթը ժամանակակից հասարակությանը մոտեցնելու համար։ Այս նախագիծը բացառիկ հնարավորություն է՝ բացելու թանգարանի դռները դեպի նոր լսարաններ։ Արվեստը չպետք է մնա միայն պատերին կախված պատկեր. այն պետք է խոսի, ապրի, կրվի և զգացվի։ Այս նախաձեռնությամբ մենք ուզում ենք ցույց տալ, որ դասական արվեստը կարող է լինել նաև նորաձևության լեզվով ժամանակակից և կենսունակ», – ասել է Ռուսական արվեստի թանգարանի տնօրեն Մարինե Մկրտչյանը։

«Moment of White» բրենդի հիմնադիր թիմը ընդգծում է նախագծի ստեղծարար ու բարոյական արժեքը․ «Moment of White»-ի համար արվեստին անդրադառնալը նորաձև ժեստ չէ, այլ ձևի, իմաստի և գույնի խորը ուսումնասիրություն: Մենք հավատում ենք, որ կտրվածքի յուրաքանչյուր գիծ կարող է արտացոլել գեղանկարչության շունչը, իսկ ուրվագծի յուրաքանչյուր կորություն կարող է արձագանքել արվեստի գործ: Մենք մոտ ենք Ռուսական արվեստի թանգարանի առաքելությանը՝ պահպանել մշակութային հիշողությունը եզակի հավաքածուների միջոցով և հետևաբար, այս համագործակցությունը ընկալում ենք որպես թանգարանի մտավոր և հուզական լանդշաֆտին նրբորեն ինտեգրվելու հնարավորություն: Մեզ համար սա հավակնոտ և միևնույն ժամանակ պատվաբեր մարտահրավեր է՝ գտնել շփման կետ նորաձևության և հավերժի, դիզայնի կառուցվածքի և գեղարվեստական ժառանգության ամենանուրբ կիսաթափանցիկ երանգների միջև: Մենք ձգտում ենք առաջարկել երկխոսության ոչ ավանդական ձև. ոչ թե արվեստը թարգմանել նորաձևության լեզվով, այլ թույլ տալ, որ դրանք հնչեն միասնաբար՝ ոգեշնչելով նոր սերնդին ավելի խորը զգալ և ավելի լայն տեսնել»:

«Մշակույթի զարգացման» հիմնադրամը կարևորում է նախաձեռնության կրթական բաղադրիչը։ «Մենք համոզված ենք, որ մշակույթը պետք է արմատավորվի կրթության մեջ, իսկ կրթությունը՝ մշակույթում։ Այսպիսի համագործակցությունները բացառիկ հնարավորություն են՝ երիտասարդներին ներգրավելու արվեստի պրոֆեսիոնալ դաշտում, աջակցելու նրանց մասնագիտական կողմնորոշմանը և միաժամանակ ստեղծելու ստեղծարար արդյունաբերության նոր մոդելներ։ Նախագծի շրջանակում նախատեսում ենք կազմակերպել կրթական այցեր, վարպետության դասեր, մենթորական ծրագրեր, որոնք կխրախուսեն արվեստը որպես մասնագիտություն ընկալելու և զարգացնելու գաղափարը։ Ժամանակակից Հայաստանը կարիք ունի նոր մոտեցումների՝ արվեստը և նորաձևությունը դիտարկելով որպես հանրային զարգացման ու ինքնության ձևավորման գործիք», – նշում է հիմնադրամի տնօրեն Կարեն Ավետիսյանը։

Այս յուրահատուկ եռակողմ նախաձեռնությունը շեշտում է, որ մշակույթը կարող է և պետք է շփման նոր կետեր ստեղծի արվեստի, նորաձևության, կրթության ու հասարակության տարբեր շերտերի միջև՝ ապահովելով Հայաստանի մշակութային վերածնունդն ու միջազգային ներկայությունը նոր ձևաչափերով։

Հետևեք մեզ՝ այստեղ