ԴԻԱԼՈԳ կազմակերպությունը՝ «Ծնվել եմ Արցախում» ծրագրի գործընկեր

ԴԻԱԼՈԳ հասարակական կազմակերպությունը ստանձնել է «Ծնվել եմ Արցախում» կրթական ծրագրի մասնակիցներից հինգ պատանի երաժիշտների մեկամյա մասնագիտական դասընթացների հովանավորությունը։ Այն սահմանված է ԴԻԱԼՈԳ կազմակերպության և «Արվեստ23» կազմակերպության միջև կնքված համաձայնագրով։   

ԴԻԱԼՈԳ կազմակերպության կրթաթոշակառուները Արցախից տեղահանված հետևյալ երիտասարդ երաժիշտներն են` Արսեն Սաֆարյանը (18 տարեկան, շեփոր), Էդվարդ Սարգսյանը (18 տարեկան, դաշնամուր), Ալեքսանդրա Հայրապետյանը (18 տարեկան, ջութակ), Ռոման Ավանեսյանը (15 տարեկան, կլարնետ) և Վլադիմիր Գալստյանը (15 տարեկան, դաշնամուր)։

«Արցախի մշակութային ավանդույթների և ժառանգության  պահպանմանն ուղղված մեր նախագծերում  «Ծնվել եմ Արցախում» ծրագրի հետ գործընկերությունն իր ուրույն տեղն ունի։ Այն ուղղված է ծրագրի մասնակից տաղանդավոր երիտասարդների մասնագիտական առաջընթացին և մշակութային միջազգային ասպարեզում նրանց համար արժանի տեղ ապահովելուն։ Ապագայում յուրաքանչյուր անգամ արցախցի կայացած երաժիշտների բեմ բարձրանալու առիթով աշխարհի  հեղինակավոր լսարաններում նրանց ծննդավայրի հիշատակումը միջազգայնորեն կենդանի է պահելու Արցախը։

Իհարկե, արցախցի երիտասարդ երաժիշտներին արժանի բարձունքների հասցնելու գործում մեծ նշանակություն ունի այս ծրագրի նախաձեռնողների և վարողների մասնագիտական կարողությունը և միջազգային լայն հաղորդակցությունը։ Մենք մեծ վստահութուն և հավատ ունենք ծրագրի թիմի և մեր հովանավորած սաների տաղանդի և աշխատասիրության նկատմամբ։ Կարևոր է նաև այն, որ ծրագրի մասնակից երաժիշտները ընտրվել են հավասար հիմունքներով անցկացվող մրցույթով՝ հեղինակավոր ժյուրիի կողմից» - նշում է ԴԻԱԼՈԳ կազմակերպության նախագահ Յուրի Նավոյանը։    

Այս համագործակցությունը ևս մեկ վկայություն է այն մասին, որ միայն համախմբված ջանքերով հնարավոր է ստեղծել իրական ազդեցություն, որի շնորհիվ Արցախի պատանի երաժիշտները հնարավորություն ունեն շարունակելու իրենց կրթությունը և հետամուտ լինել իրենց մասնագիտական երազանքներին: ԴԻԱԼՈԳ կազմակերպության աջակցությունն ամրապնդում է այն համոզմունքը, որ կրթությունը՝ որպես հզոր արժեք, կարող է վերածնել հույսը և ձևավորել ապագան։

«Այս աջակցությունն առանձնակի կարևոր է մեր ծրագրի ընթացքի և մասնակից երեխաների ապագայի տեսանկյունից: Այն մեզ ևս մեկ անգամ հիշեցնում է, որ Սփյուռքը կարող է և պետք է լինի այսպիսի նախաձեռնությունների ակտիվ մասնակիցը։ Ամեն ձեռքը, ամեն ներդրումը ձևավորում է այն ճանապարհը, որով Արցախի պատանիները վերադառնում են իրենց երազանքներին» — ասում է Աննա Տեր-Հովակիմյանը, «Արվեստ23» կազմակերպության նախագահը։

«Ծնվել եմ Արցախում» կրթական ծրագիրը մեծ հնարավորություն է Արցախից տեղահանված երիտասարդների համար՝ վերականգնելու իրենց երազանքները և վերաիմաստավորելու իրենց ապագան երաժշտության և կրթության ուժի միջոցով: Ծրագիրը, խթանելով իր մասնակից-երաժիշտների մուտքը միջազգային ասպարեզ, նպատակ ունի նրանց կենսագրություններում «Ծնվել եմ Արցախում» արտահայտությունը դարձնել ամենակարդացվողը աշխարհում՝ այդպիսով հանրահռչակելով Արցախի մշակութային ժառանգությունն աշխարհի ամենաբարձր բեմերում։

--

«Ծնվել եմ Արցախում» կրթական ծրագրի նպատակն է պահպանել և զարգացնել Արցախում ծնված, այսօր Հայաստանում ապրող տաղանդավոր պատանի երաժիշտների մշակութային ժառանգությունը։ Ծրագրի գաղափարը Հայաստանի պետական սիմֆոնիկ նվագախմբի գեղարվեստական ղեկավար և գլխավոր դիրիժոր, UNICEF-ի ազգային դեսպան Սերգեյ Սմբատյանինն է։ Ծրագրի շրջանակում ընտրված 23 պատանի երաժիշտներ 5 տարի շարունակ ստանալու են խորացված մասնագիտական կրթություն և հնարավորություններ՝ ելույթ ունենալու աշխարհի տարբեր բեմերում հնչեցնելով՝ «Ծնվել եմ Արցախում» արտահայտությունը։

Ծրագիրն իրականացվում է «Մենք ենք մեր սարերը» զարգացման գործակալության, «Հայաստան» համահայկական հիմնադրամի, Ամերիկայի հայ ավետարանչական ընկերակցության Հայաստանի մասնաճյուղի և անհատ բարերարներ՝ Յուրի Նավոյանի, Կարո Սարգսյանի և Հայկ Եգանյանի աջակցությամբ։