Հասմիկ Կարապետյան.«Կատարվում այն, ինչ պետք է կատարվի»

Bravo.am-ը գրում է.

Շուրջ երկուսուկես տարի ընդմիջումից հետո Հասմիկ Կարապետյանը դարձյալ եթերում է. երգչուհին վարում է «Կենտրոն» հեռուստաընկերության «Սկսենք նորից» առավոտյան ծրագիրը: Նա BRAVO.am-ի հետ զրույցում հայտնել է, որ շատ էր կարոտել հաղորդավարի աշխատանքը: 

«Քանի որ Ռաֆայել Ղազանչյանի հետ առավոտյան հաղորդում էլի էի վարել «Արմենիա»-ում, մտածեցի, որ երկարատեւ դադարից հետո կարելի է վերադառնալ եթեր: Այս տարիների ընթացքում շատ երկրպագուներ, հեռուստադիտողներ, ովքեր սովոր էին ինձ տեսնել եթերում, ասում էին, որ շատ են կարոտել: Ես էլ եթերն ու իմ հանդիսատեսին եմ կարոտել»,-ասել է նա` հավելելով, որ ինչպես բեմը, ուղիղ եթերը նույնպես ունի կախարդիչ ուժ: 

Հասմիկը չի սիրում եթերում լինել արհեստական, ամեն առումով «չափված եւ ձեւված», վստահ է, որ հեռուստադիտողը նկատում է ամեն մի հայացք, շարժում եւ զգում, թե ինչ է կատարվում հաղորդավարի հոգում.«Կարծում եմ` նրանք կարոտել են հենց իմ անկեղծությունն ու անմիջականությունը: Սիրում եմ եթերը: Հնարավոր է` շատերի համար այդ երեւույթը վախենալու է. չէ՞ որ ամեն մարդ պետք է իր գործով զբաղվի: Լրագրողի մասնագիտությունս կիսատ եմ թողել, այս դաշտում ինձ արհեստավարժ չեմ համարում, բայց մեր ժամանակներում շատ հնարավոր է մի երգչուհու տեսնել որեւէ սերիալում կամ դերասանուհու` երգելիս: Այդ պատճառով ինձ թույլ տվեցի մտնել հեռուստաաշխարհ, ուր ամեն ինչ հետաքրքիր է, գունեղ, բայց նաեւ շատ վտանգավոր. դու կարող ես սպառվել, հետաքրքիր չլինել»:

Խոսելով երգարվեստից` Հասմիկն ասել է, որ շարունակում է ստեղծագործել եւ համագործակցել ԴերՀովայի հետ: Գարնանը կնկարահանվի իր նոր` “Դու պիտի ապրես” երգի տեսահոլովակը: Զգում է, որ երգը բարի, լուսավոր ուժ ունի, հույս կներշնչի մարդկանց եւ ուժ հաղորդի: 

«Փոքրիկ նվագախմբով ելույթ ունենալու ծրագրեր կան ինչպես Երեւանում, այնպես էլ Գյումրիում, որտեղ հաճախ ենք լինում ամուսնուս աշխատանքի շնորհիվ. նա իրականացնում է «Հույս» Գյումրիի շենացման բարեգործական ծրագիրը: Այնտեղի ջազ ակումբում հանդես գալու նպատակ եւս կա: Ժամանակը ցույց կտա: Ապրում եմ այսօրվա օրով: Որքան էլ պլանավորում ենք, կատարվում այն, ինչ պետք է կատարվի»-ասել է նա:

Շարունակությունը՝ այստեղ