Մեկնարկում է «Ֆիլհարմոնիկը՝ մարզերում» ծրագիրը

ՀՀ կրթության, գիտության, մշակույթի և սպորտի նախարարության աջակցությամբ Հայաստանի ազգային ֆիլհարմոնիկ նվագախումբը (գեղարվեստական ղեկավար և գլխավոր դիրիժոր` Էդուարդ Թոփչյան) ներկայացնում է «Ֆիլհարմոնիկը՝ մարզերում» ծրագիրը: Նվագախմբի 100-ամյակի շրջանակում մարզային հյուրախաղերի մեկնարկը կտրվի հուլիսի 18-ին Կոտայքի մարզից, այնուհետև համերգները կշարունակվեն Արմավիրի և Արարատի մարզերում:

Հայաստանի ազգային ֆիլհարմոնիկ նվագախմբի մարզային համերգները՝

• հուլիսի 18-ին՝ ժամը 14:00-ին, Չարենցավանի Ար. Խաչատրյանի անվան երաժշտական դպրոցի երգեհոնային դահլիճ,
• հուլիսի 18-ին՝ ժամը 19:00-ին, Հրազդանի դրամատիկական թատրոն,
• հուլիսի 20-ին՝ ժամը 14:00-ին, Մեծամորի մշակույթի տուն,
• հուլիսի 20-ին՝ ժամը 19:00-ին, Վաղարշապատի Կոմիտասի անվան մշակույթի պալատ,
• հուլիսի 22-ին՝ ժամը 14:00-ին, Արտաշատի Ամո Խարազյանի անվան պետական դրամատիկական թատրոն,
• հուլիսի 22-ին՝ ժամը 19:00-ին, Վերին Արտաշատ գյուղի մշակույթի տուն:

Նվագախմբի կատարմամբ կհնչեն հայ կոմպոզիտորների սիրված ու ճանաչված ստեղծագործությունները՝ Արամ Խաչատրյանի «Դիմակահանդես» դրամայի համար գրված երաժշտությունը, հատվածներ «Գայանե» բալետից, Ալեքսանդր Սպենդիարյանի «Երևանյան Էտյուդներ»-ը (1-ին մաս` «Էնզելի»), Գրիգոր Եղիազարյանի «Սևան» բալետից «Ձկնորսների պարը», Էդվարդ Միրզոյանի «Շուշանիկ» քնարական պատկերը, Ալեքսանդր Հարությունյանի «Վալսը» և այլ ստեղծագործություններ:

Հայաստանի ազգային ֆիլհարմոնիկ նվագախմբի մարզային համերգները կլինեն շարունակական. սեպտեմբերից նվագախումբը ելույթներով հանդես կգա Գյումրիում, Ստեփանավանում, Գորիսում, Սիսիանում, Մեղրիում, Կապանում և այլ քաղաքներում ու գյուղերում: