Ռուս միլիարդատերը տեղափոխվել է ԼՂՀ՝ բնակություն հաստատելու

Ռուս գործարար, միլիարդատեր Գերման Ստերլիագովը ընտանիքով, կնոջ և հինգ երեխաների հետ, տեղափոխվել է Լեռնային Ղարաբաղի Հանրապետություն՝ Շուշի, բնակություն հաստատելու:

Հայտնի բիզնեսմենին, ով ապրում է միլիարդատիրոջը ոչ այնքան նման կենսակերպով, չի հուզում այն հանգամանքը, որ նա հայտնվել է Ադրբեջանի սև ցուցակում:

Ստերլիագովը չի նշում, թե ինչ պատճառով է լքել Ռուսաստանը, սակայն նշում է, որ իրեն լուրջ վտանգ էր սպառնում այնտեղ: Սակայն բոլորին հրավիրում է Շուշիում կայանալիք մամուլի ասուլիսին, որտեղ կասի պարզ ճշմարտությունը, թե ինչու է տեղափոխվել Շուշի:

Նա պատրաստվում է նոր բիզնես հիմնադրել: Շուշիի գորգերի թանգարանում ուսումնասիրում են ղարաբաղյան հագուստն ու նորաձևությունը: Ստերլիագովը նշում է.

-Ես երջանիկ եմ, որ հենց այստեղ եմ բերել երեխաներիս: Ինչպես կարող է մեզ այստեղ դուր չգալ: Երջանիկ են հայերը, որ ունեն նման գեղեցկություն, ինչպես Ղարաբաղն է: Ես եղել եմ ամբողջ աշխարհում, բայց երբեք չեմ տեսել նման գեղեցկություններ, նման մարդկային հարաբերություններ: Հնարավոր չէ պատկերացնել ռուսներին, թե ինչպիսի ջերմ հարաբերություններ են մարդկանց մեջ, դա աննախադեպ դաս է իմ երեխաների համար: Սա ունիկալ վայր է աշխարհում, որտեղ պահպանված են հին մարդկանց ջերմ հարաբերությունները: Փառք Աստծուն:

Մեզ համար, իհարկե, երևույթը հաճելի է, սակայն կուզեի ուշադրություն հրավիրել այն հանգամանքին, որ թեև շատ լրատվամիջոցներ նշում են, որ միլիարդատիրոջը Ղարաբաղի բնությունը չէ, որ բերել է այստեղ, սակայն փաստ է, որ եթե Ստերլիագովը Ռուսաստանի խնդիրներից փախչել էր ուզում, կարող էր գնալ նաև, ասենք ԱՄՆ, բայց նա ընտրել է հենց Լեռնային Ղարաբաղը:

Արուսիկ Տիգրանյան