Հունաստանը չի վերածվի Եվրոպայի անպաշտպան դարպասի. Միցոտակիս

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Հունաստանի վարչապետ Կիրիակոս Միցոտակիսը սոցցանցերում իր ամենշաբաթյա գրառման մեջ անդրադարձել է Կրետե կղզի միգրանտների հոսքի ավելացման խնդրին՝ հայտարարելով, որ կառավարությունը թույլ չի տա, որ երկիրը դառնա Եվրոպայի անպաշտպան դարպասը, գրում է Kathimerini-ն։

«Միգրացիան ժամանակավոր ճգնաժամ չէ։ Այն իրականություն է, որը փոխում է իր ձևը, ուժեղանում կամ նվազում, բայց երբեք չի անհետանում։ Անխիղճ մաքսանենգները փոխում են մարտավարությունն ու ուղիները՝ իրենց գործողությունները տեղափոխելով այնտեղ, որտեղ սողանցք են գտնում, և այս անգամ այդ սողանցքը Լիբիան է», - ասել է Միցոտակիսը։

Նա հայտարարել է, որ Հունաստանը կձեռնարկի բոլոր անհրաժեշտ գործողությունները՝ Միջերկրական ծովով միգրացիոն նոր ուղու ստեղծումը կանխելու համար՝ զուգահեռներ անցկացնելով 2020 թվականին Էվրոսի հյուսիսային սահմանին տեղի ունեցած ճգնաժամի հետ, երբ հազարավոր միգրանտներ փորձեցին Թուրքիայից Հունաստան մտնել։

«Մեր ուղերձը հստակ է՝ Հունաստանը թույլ չի տա երկիր և Եվրոպա մուտք գործելու նոր անօրինական ուղու ստեղծում։ Ինչպես 2020 թվականին Էվրոսի դեպքում, այժմ էլ կանենք ամեն անհրաժեշտ բան՝ նրանց կանգնեցնելու համար», - ասել է նա։

Միցոտակիսը հավելել է, որ իր կառավարությունն արդեն արտակարգ միջոցներ է ձեռնարկում միգրացիոն նոր ուղին կասեցնելու համար, ինչպես նաև Լիբիայի իշխանություններին կոչ է արել համագործակցել Հունաստանի հետ։

«Արտակարգ միջոցներ ենք ձեռնարկում Հյուսիսային Աֆրիկայից եկող ուղին փակելու համար։ Այս համատեքստում Լիբիային համագործակցության կոչ ենք անում, ի վերջո, հարևան երկրի հարաբերությունները Եվրամիության հետ անցնում են Հունաստանով», - ասել է Միցոտակիսը։ - «Մեր դիրքորոշումը կոշտ է, բայց լիովին օրինական և հիմնավորված։ Գիտեմ, որ շատ քաղաքացիներ անհանգստություն են զգում։ Կիսում եմ այդ զգացումը։ Ես չեմ թաքնվում թվերի կամ հայտարարությունների հետևում։ Ճնշումն իրական է, և մեր պատասխանը հստակ է՝ Հունաստանն անպաշտպան դարպաս չի դառնա»։

Հետևեք մեզ՝ այստեղ