Ագարակում ավազակային հարձակման ենթարկված առեւտրականը դանակի 24 հարված էր ստացել

Սյունիքի մարզի Ագարակ քաղաքում փետրվարի 4-ին ավազակային հարձակման ենթարկված Հարություն Բադալյանի վիճակը կայուն ծանր է, գտնվում է Վերակենդանացման բաժանմունքում: Այս մասին NEWS.am-ի թղթակցին ասաց Մեղրու տարածաշրջանային բժշկական կենտրոնի տնօրեն Լուսինե Վարդանյանը:

«Հարություն Բադալյանը ստացել է դանակի 24 հարված, որից երկուսը՝ կրծքավանդակի շրջանում, 7-ը՝ որովայնի: Քիթն է նաեւ կոտրված, վիրահատության է ենթարկվել, այժմ վիճակը կայուն ծանր է»,- ասաց Լուսինե Վարդանյանը:

ԲԿ-ի տնօրենի խոսքով՝ Հարություն Բադալյանը գիտակցություն ունի, սակայն թույլ չեն տալիս խոսել:

Ավելի վաղ Քննչական կոմիտեն հաղորդել էր, որ 2016թ. փետրվարի 4-ին  երեկոյան հիվանդանոց է տեղափոխվել Ագարակի բնակիչ, 52-ամյա Հարություն Բադալյանը՝ կրծքավանդակի առաջնային պատի, ձախ գոտկային շրջանի, ձախ ազդրի ծակած կտրած վերքեր, որովայնի ծակած, կտրած թափանցող վերքեր, բարակ աղու ճարպոնի, աղու միջընդերքի վնասումով, դեմքի սալջարդ վերքեր և քթոսկրի կոտրվածք ախտորոշումով:

Քննությամբ պարզվել է, որ նույն օրը ժամը 20:30-ի սահմաններում, առերևույթ հանցագործություն կատարած անձինք, նախնական համաձայնությամբ, ուրիշի գույքն ավազակության եղանակով հափշտակելու դիտավորությամբ, որպես զենք օգտագործվող սուրկտրող-ծակող առարկաներով զինված, դիմակավորված, ապօրինի մուտք են գործել Հ.Բադալյանի բնակարանին կից հագուստի վաճառասրահ։ Կյանքի և առողջության համար վտանգավոր բռնություն գործադրելով՝ Հ.Բադալյանին նստեցրել են աթոռին, կապկպել կպչուն ժապավենով, սուր կտրող-ծակող գործիքով բազմաթիվ հարվածներ հասցրել որովայնի շրջանին և հափշտակելով վաճառասրահում եղած հագուստեղենն ու այլ ապրանքներ՝ դիմել փախուստի:

Դեպքի առթիվ հարուցվել է քրեական գործ Քրեական օրենսգրքի 175-րդ հոդվածի 3-րդ մասի 3-րդ կետով: Գործով 2 անձ ձերբակալվել է:

Նախաքննությունը շարունակվում է։