Սովորական խմիչք, որն արժե միլիոնավոր դոլարներ. «Փաստ»

«Փաստ» օրաթերթը գրում է.

Աշխարհի ամենաթանկ ալկոհոլի վարկանիշն անընդհատ փոխվում է, քանի որ նման ըմպելիքներ արտադրողները ստեղծում են ավելի թանկ տարբերակներ՝ ըստ երևույթին հուսալով հայտնի դառնալ՝ հայտնվելով Գինեսի ռեկորդների գրքում:

Չնայած մինչ այս նյութի հրապարակումը գուցե մեկ ուրիշ ռեկորդակիր «հայտնվի», բայց ներկայում այդ հարցում առաջին տեղը պատկանում է անգլիացիներին, որոնք ստեղծել են անհասկանալի թանկարժեք վիսկի, որը կոչվում է Isabellas Islay։ Դրա մեկ շշի արժեքը կազմում է մոտ 6,2 մլն դոլար, չնայած արտադրվում է այս վիսկիի նաև «բյուջետային» տարբերակը՝ մոտ 750 հազար դոլար արժողությամբ։

Ինչո՞վ է պայմանավորված նման գինը, ինչի՞ց է պատրաստված այդ խմիչքը, և ինչ-որ մեկը պատրա՞ստ է այդքան գումար վճարել դա համտեսելու համար։ Իրականում այդ վիսկիի գինը հիմնականում պայմանավորված է շշի ինքնարժեքով։

Այս հրաշքի ստեղծողը՝ Luxury Beverage ընկերությունը, հայտնի է դարձել՝ մի քանի տարի առաջ թողարկելով Ruwa-ն՝ աշխարհի ամենաթանկ ոչ ալկոհոլային ըմպելիքը: Այդ բացառիկ արտադրանքի մեկ շիշն արժե մոտ 5,5 միլիոն դոլար: Հիմա էլ նրանք մշակել են Isabellas Islay-ը՝ բարձրորակ, լավ հնեցված վիսկի, որը պատրաստված է ավանդական տեխնոլոգիայով: Այսինքն, գնորդը համտեսի ժամանակ առանձնահատուկ հաճույք չի զգա՝ դա պարզապես բարձրորակ վիսկի է։ Բայց ի՜նչ տարա ունի։ Նախատեսված շշերը հասանելի են երկու տարբերակով, և յուրաքանչյուր շիշը կարող է փոքր-ինչ փոփոխվել հաճախորդի ցանկությամբ: Առաջին և ամենաթանկ տարբերակը Isabella Original-ն է։ Դրանք այն շշերն են, որոնք ներկայում վաճառվում են յուրաքանչյուրը 6,2 միլիոնով։ Դա բյուրեղապակյա շիշ է, որը զարդարված է ավելի քան 8 հազար սպիտակ ադամանդներով և մոտ 300 ռուբիններով՝ կնքված սպիտակ ոսկուց խցաններով։ Արդյունքում յուրաքանչյուր շիշ ձեռքով ստեղծված իսկական ոսկերչական արվեստի գործ է։ Երկրորդ՝ ավելի «դեմոկրատական» տարբերակը, Isabella Special Edition-ն է, որն արժե, ինչպես արդեն նշեցինք, «ընդամենը» 740 հազար դոլար։ Այդ շիշը պատրաստված է բյուրեղապակուց և սպիտակ ոսկուց, ունի ադամանդներ, որոնք օգտագործվում են տառերը զարդարելու համար: Ի դեպ, Isabellas Islay–ի շիշը կարելի է օգտագործել մեկից ավելի անգամ, ուստի կարելի է ասել, որ գնորդն ավելի շուտ օրիգինալ սպասք է գնում, քան բուն խմիչք։

Իսկ մինչ Isabellas Islay-ի շուկա դուրս գալը աշխարհի ամենաթանկ վիսկին 1906 թվականին Aisla T'Orten-ի կողմից ստեղծված ըմպելիքն էր: Այն արժեր 1,4 միլիոն դոլար և պահվում էր շոտլանդական մի ընտանիքում ավելի քան մեկ դար՝ մինչև 2010 թվականը, երբ վաճառվեց Master of Malt ընկերությանը: Այս դեպքում վիսկիի գինը պայմանավորված էր ոչ թե շշով, այլ պարունակությամբ:

ԿԱՄՈ ԽԱՉԻԿՅԱՆ

Մանրամասները՝ «Փաստ» օրաթերթի այսօրվա համարում