Թրամփի շրջապատի զենք արտադրողները բազմամիլիարդանոց կառավարական պայմանագրեր կստանան. Financial Times

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

ԱՄՆ նախագահ Դոնալդ Թրամփի շրջապատի հետ սերտորեն կապված ամերիկյան պաշտպանական ընկերությունները կարող են միլիարդավոր դոլարների պայմանագրեր ստանալ նոր պետական ծախսերի օրինագծի շրջանակում, գրում է Financial Times-ը։

Պարբերականի տվյալներով՝ հիմնական շահառուները կլինեն Anduril Industries-ը և Palantir Technologies-ը, որոնք պատկանում են գործարարներ Փիթեր Թիլին և Փալմեր Լաքիին՝ 2024 թվականին Թրամփի վերընտրության ակտիվ կողմնակիցներին, հայտնել է ТАСС-ը։

Financial Times-ը նշում է, որ Anduril Industries-ը, լինելով ինքնավար դիտաշտարակների միակ հավաստագրված մատակարարը, մեծ հավանականությամբ կստանա ԱՄՆ-ից դուրս սահմանային համակարգերի տեղադրման համար նախատեսված ամբողջ 6 միլիարդ դոլարի փաթեթը։

Բացի դրանից, Palantir Technologies-ը նախկինում 10 միլիարդ դոլարի պայմանագիր է կնքել ԱՄՆ բանակի հետ՝ հետախուզական կարիքների համար վերլուծական ծրագրային ապահովում մշակելու համար։

Պարբերականը միաժամանակ ընդգծում է, որ բանակի և հետախուզության արդիականացման համար պատասխանատու ներկայիս վարչակազմի մի շարք պաշտոնյաներ նախկինում աշխատել են նշված ընկերություններում։ Բացի դրանից, ըստ Financial Times-ի, Anduril-ի և Palantir-ի բաժնետոմսերը Թրամփի մտերիմ դաշնակիցների՝ դրանց թվում՝ նրա որդու՝ Դոնալդ Թրամփ կրտսերի և վարչակազմի ղեկավարի տեղակալ Սթիվեն Միլլերի ներդրումային պորտֆելների մեջ են։

2024 թվականի դեկտեմբերին Anduril -ը և Palantir-ը հայտարարեցին արհեստական բանականության ռազմական տեղակայումը արագացնելու համար կոնսորցիում ստեղծելու մասին։ Երկու ընկերություններն էլ մասնակցում են «Titan» նախագծին, որն իրականացնում է ԱՄՆ բանակը և նպատակ ունի արհեստական բանականության հետախուզության և թիրախավորման համակարգ մշակել։

Հուլիսի 3-ին Կոնգրեսի ընդունած ծախսերի մասին օրենքը նախատեսում է ԱՄՆ պաշտպանության բյուջեի ավելացում մինչև 150 միլիարդ դոլար, ներառյալ անօդաչու թռչող սարքերի և իսրայելական «Երկաթե գմբեթ» տիպի պրովայդերների մշակումը։ Եվս 165 միլիարդ դոլար կուղղվի Ներքին անվտանգության դեպարտամենտի կարիքներին, դրանց թվում՝ սահմանային վերահսկողության ուժեղացմանը։

Հետևեք մեզ՝ այստեղ