Մի քանի օր է՝ Նուբարաշենի աղբավայրը ծխում է, քաղաքը ծխի մեջ է

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Արդեն մի քանի օր է, ինչ Երևանը փոշուց բացի պատված է նաև ծխով։ Շուրջ 3 օր այրվում է Նուբարաշենի աղբավայրը, ինչը, ցավոք, ո՛չ առաջին դեպքն է, ո՛չ վերջինը։ 

Նուբարաշենի աղբավայրը հիմնվել է 1960թ.-ին, արդեն 65 տարի է այն, ցավոք սրտի, դարձել է Երևանի այցեքարտերից մեկը՝ վատ իմաստով: Այստեղ է կուտակվում մայրաքաղաքի ու հարակից բնակավայրերի ամբողջ աղբը, պարբերաբար հրդեհները ծխով են պատում ոչ միայն Նուբարաշեն վարչական շրջանը, որը հենց այս աղբանոցի պատճառով Երևանից, կարծես, կտրված լինի, այլև երևանյան շատ թաղամասեր. Գարշահոտն ու ծուխը տարածվում են տասնյակ կիլոմետրեր:

Հարկ է նշել, որ բազմիցս խոսվել է աղբի մշակման գործարան ունենալու անհրաժեշտության մասին, տարիներ շարունակ մայրաքաղաքի իշխանությունները այս հանգամանքը որպես նախընտրական խոստում առաջ են քաշել, ապա մոռացության հանձնել: Ըստ խոստումների՝ գործարանը պետք է մաս-մաս բեռնաթափեր Նուբարաշենի աղբավայրը, սակայն ինչպես տեսնում ենք՝ չկա գործարան, դրա փոխարեն կա մարդու առողջության համար լրջագույն խնդիր առաջացնող մի ահռելի աղբավայր։

Երևանի քաղաքապետի մամուլի քարտուղար Հայկ Կոստանյանը MediaHub-ի հետ զրույցում նշեց, որ աղբավայրում այսօր ևս շարունակվում են հողային աշխատանքները:

Ճշտող հարցին՝ այս պահին կա՞ն այրվող հատվածներ, Կոստանյանը պատասխանեց․ «Այրվող չկան, ծխացող հատվածներ են, որոնք էլ հողային աշխատանքներով ծածկվում են»։

Մեր զրուցակիցը նաև հավելեց՝ հրդեհն օգոստոսի 8-ի ուշ գիշեր է եղել, փրկարար ծառայությունն այն մարել է, իսկ արդեն դրա հաջորդող օրերին ծխացող հատվածներում հողային աշխատանքներ են տարվում։

ՆԳՆ մամուլի քարտուղար Նարեկ Սարգսյանն էլ մեզ հետ զրույցում նշեց, որ ահազանգը ստանալու պահից 6 մարտական հաշվարկ հրդեհաշիջման աշխատանքներ են իրականացնում, սրան զուգահեռ հերթապահություն է սահմանվել։

Իսկ թե ե՞րբ Երևանի օդը վերջապես կմաքրվի ծխից, հայտնի չէ։

Հետևեք մեզ՝ այստեղ