Փաշինյանն ընտրում է իր սեփական, այլ ոչ թե հայ ժողովրդի շահերը. «Փաստ»

«Փաստ» օրաթերթը գրում է.

news.ru-ն «Փաշինյանը կրկին երես է թեքել ԵԱՏՄ-ից. նրա սխալը թանկ կարժենա Հայաստանին» վերնագրով հոդվածում գրում է, որ Նիկոլ Փաշինյանը հրաժարվել էր մասնակցել ԵԱՏՄ երկրների միջկառավարական խորհրդի նիստին: Դրա պաշտոնական պատճառը քաղաքական գործչի կարճատև արձակուրդն էր: Հայաստանում կառավարության ղեկավարի այդ որոշումից զարմացած չեն, սա առաջին դեպքը չէ, սակայն նրա դեմարշները կարող են շատ թանկ նստել հանրապետության վրա:

Փաշինյանը չէր մասնակցել ԵԱՏՄ խորհրդի նիստին, քանի որ օգոստոսի 12-ից 15-ը ներառյալ արձակուրդում է: Սա Փաշինյանի արդեն երրորդ արձակուրդն է այս ամառ: Առաջինը հուլիսի 18-ից 23-ին էր, որից հետո նա որոշեց արձակուրդ գնալ հուլիսի 28-ից օգոստոսի 15-ը։ Սակայն ավելի ուշ հայտնի դարձավ, որ վարչապետը ընդհատել է իր արձակուրդը և մեկնել Վաշինգտոն, որտեղ ԱՄՆ նախագահ Դոնալդ Թրամփի միջնորդությամբ ստորագրվել է Հայաստանի և Ադրբեջանի միջև հակամարտության դադարեցման վերաբերյալ համատեղ հռչակագիր։

ՀԴԿ առաջնորդ Արամ Սարգսյանը news.ruին տված հարցազրույցում խոստովանել է, որ իրեն չի զարմացրել Փաշինյանի՝ Ղրղզստան մեկնելուց հրաժարվելը։ «Նա այժմ բացարձակ անտարբերություն է ցուցաբերում Ռուսաստանի հետ համագործակցության ուղղության նկատմամբ։ Սա առաջին դեպքը չէ, որ նա չի մասնակցում Մոսկվայի հետ կապված որևէ գագաթաժողովի կամ հանդիպման։ Ավելին, վերջերս Վաշինգտոնում տեղի ունեցած իրադարձությունները շատ բան են ասում», - նշել է քաղաքական գործիչը։

Իրոք, սա Փաշինյանի առաջին դեմարշը չէ ԵԱՏՄ-ի դեմ։ 2023 թվականի դեկտեմբերին Հայաստանի վարչապետը բացահայտ քննադատեց միությունը՝ ասելով, որ դրա գործունեությունը պետք է լինի բացառապես տնտեսական բնույթի՝ առանց որևէ քաղաքական կամ աշխարհաքաղաքական օրակարգի։ 2024 թվականի դեկտեմբերին էլ Փաշինյանը չմասնակցեց Լենինգրադի մարզում կայանալիք Բարձրագույն եվրասիական տնտեսական խորհրդի նիստին՝ կորոնավիրուսի դրական թեստի արդյունքի պատճառով։ Սկզբում միջոցառումը նախատեսված էր անցկացնել Հայաստանի մայրաքաղաքում, սակայն Փաշինյանն այդ գաղափարը անվանել էր անիրագործելի։ «ԵԱՏՄ Բարձրագույն տնտեսական խորհրդի ոչ բոլոր անդամներն են ցանկալի Հայաստանի համար», - ասել էր նա։ Այդ հայտարարությունից կարճ ժամանակ առաջ էլ նա Բելառուսի ղեկավար Ալեքսանդր Լուկաշենկոյին մեղադրել էր ռազմական գործողությունների ժամանակ Ադրբեջանին աջակցելու մեջ և խոստացել, որ Հայաստանի ոչ մի պաշտոնական ներկայացուցիչ չի մեկնի Մինսկ։ Արդյունքում, երբ Բելառուսում 2025 թվականի հունիսին տեղի ունեցավ ԵԱՏՄ ղեկավարների հանդիպումը, Փաշինյանը մասնակցեց դրան տեսակապի միջոցով։

Պետդումայի ԱՊՀ հարցերով հանձնաժողովի նախագահի առաջին տեղակալ Վիկտոր Վոդոլացկին news.ru-ի հետ զրույցում նշել է, որ Փաշինյանը պարբերաբար մեկ բան ասում է, մեկ այլ բան անում։ Միևնույն ժամանակ, նա վաղուց է հետևում արևմտամետ կուրսին, չնայած դա կարող է լուրջ հարված հասցնել Հայաստանի տնտեսությանը։ «Եթե նայեք 2020-2023 թվականների տվյալներին, կարող եք տեսնել, որ ԵԱՏՄ-ին անդամակցության շնորհիվ Հայաստանի ՀՆԱ-ն ավելի շատ է աճել, քան մյուս մասնակից երկրներինը։ Բայց Փաշինյանն արդեն ընտրել է իր համար զարգացման արևմտյան վեկտոր։ Նա չի հարցրել իր քաղաքացիներին, թե արդյո՞ք նրանք դա ցանկանում են։ Նա պաշտպանում է իր շահերը, նույնիսկ եթե դրանք հակասում են Հայաստանի շահերին։ Ահա թե ինչու նա թողեց ամեն ինչ և գնաց Միացյալ Նահանգներ, երբ Թրամփը զանգահարեց նրան։ Եվ երբ նա պետք է գնար Ֆրանսիա՝ Մակրոնի մոտ, նա նույնպես անմիջապես գնաց», - նշել է պատգամավորը։

Նմանատիպ կարծիք ունի նաև «Մայր Հայաստան» շարժման առաջնորդ Անդրանիկ Թևանյանը։ «Նույնիսկ մարտավարական տեսանկյունից սա սխալ է, քանի որ Ռուսաստանի հետ առևտրաշրջանառությունը ԵԱՏՄ-ի շրջանակներում կազմում է տարեկան 13 միլիարդ դոլար։ Իսկ հայկական գյուղատնտեսական հիմնական արտադրանքը վաճառվում է ԵԱՏՄ-ում և, մասնավորապես, Ռուսաստանում։ Եթե Փաշինյանը հրաժարվի հանդիպել ԵԱՏՄ-ի շրջանակներում, ապա դա սխալ է տնտեսական տեսանկյունից», - ասել է նա news.ru–ին։

Երևանը բազմիցս է հակասական հայտարարություններ արել ԵԱՏՄ-ում Հայաստանի ապագայի վերաբերյալ։ Էկոնոմիկայի նախարար Գևորգ Պապոյանի խոսքով, հանրապետությունը չի պլանավորում դուրս գալ այդ միությունից։ Սակայն անցյալ գարնանը խորհրդարանն օրենք ընդունեց Հայաստանի՝ ԵՄ-ին անդամակցության գործընթացի մեկնարկի մասին։ Փաշինյանը հետագայում հաստատեց, որ երկիրը չի կարող միաժամանակ լինել երկու միության անդամ։ Նրա հաշվարկներով, Բրյուսելը մոտ 20 տարի հետո կընդունի հանրապետությունը։ Փաշինյանի խոսքով, վերջին հաշվով, Հայաստանի քաղաքացիները պետք է ընտրեն, թե որ ուղղությամբ է երկիրը գնալու։ «Մյուս կողմից՝ մենք Ռուսաստանի հետ հարաբերությունները խզելու խնդիր չունենք, քանի որ մենք վարում ենք հավասարակշռված արտաքին քաղաքականություն, և դա մեր ռազմավարությունն է», - հավելել էր նա։

Ըստ Թևանյանի, Փաշինյանը բացահայտորեն ստում է հայ հասարակությանը։ «Նրա համար ամենակարևորը իշխանությունը պահելն է։ Նա խաբում է հայ հանրությանը՝ ասելով, որ իբր խաղաղություն է բերում։ Բայց իրականում Փաշինյանը պաշտպանում է միայն իր աթոռը, և դրա գինը Հայաստանն է, նրա շահերը և երկրի անվտանգությունը», - ընդգծել է «Մայր Հայաստան» շարժման առաջնորդը։

Վոդոլացկին ևս կարծում է, որ Փաշինյանն ընտրում է իր սեփական, այլ ոչ թե հայ ժողովրդի շահերը։ Բիշքեկ այցելելուց հրաժարվելը նպատակ ունի ցույց տալ իր օտարերկրյա կուրատորներին, որ նա շարունակելու է օգտագործել ԵԱՏՄ-ն իր սեփական օգտի համար, բայց ինքը վաղուց է անցել Արևմուտքի կողմը, վստահ է պատգամավորը։ «Մենք չենք կարող անտեսել դա, չնայած Ռուսաստանի համար լավ է, որ Անդրկովկասում խաղաղություն է հաստատվել։ Բայց հենց Ռուսաստանն է կարևոր դեր խաղացել այդ հարցում։ Մեր քաղաքականության շնորհիվ մեր երկրում արգելված ապրանքները կարող են ներմուծվել Հայաստանի միջոցով, որոնք նա ներկայացնում է որպես իր սեփականը։ Դեռևս լուրջ հետևանքներ չկան, բայց եթե ԵԱՏՄ հանձնաժողովը քննարկի այդ հարցը, ապա դա կարող է ձախողում լինել Երևանի համար», - ամփոփել է Վոդոլացկին։

Մանրամասները՝ «Փաստ» օրաթերթի այսօրվա համարում