ՀԲ նոր վարկային ծրագրով իրականացվելու է արյունաբանական ոլորտի արդիականացման ծրագիր

Հայաստանում ընթացիկ տարում արյունաբանական և ուռուցքաբանական բժշկական օգնության և սպասարկման որակի բարելավման նպատակով իրականացվելու են ենթակառուցվածքների զարգացման նոր ծրագրեր:

«Արմենպրես»-ի փոխանցմամբ՝ այդ աշխատանքների իրականացումն ընդգրկված է ՀՀ կառավարության 2016 թ. գերակա ծրագրերի թվում:

Մասնավորապես, ՀՀ-ում առողջապահական ոլորտի արդիականացման և ոչ վարակիչ հիվանդությունների հետևանքով մահացության մակարդակի նվազեցման նպատակով  Համաշխարհային բանկի կողմից ֆինանսավորվող նոր վարկային ծրագրի շրջանակում նախատեսվում է իրականացնել արյունաբանական ոլորտի արդիականացման ծրագիր: Ըստ ՀՀ առողջապահության նախարարության, ոչ վարակիչ հիվանդությունների, այդ թվում՝ արյունաբանական հիվանդությունների վաղ հայտնաբերմանը և արդյունավետ բուժմանը անկասկած կարող է նպաստել արդի, միջազգային չափանիշներին համապատասխանող և անհրաժեշտ ս արքավորումներով հագեցած համապատասխան կենտրոնի առկայությունը:

Հաշվի առնելով ՀՀ-ում վերջին տարիներին արյունաբանական հիվանդություններով հիվանդացության տարածվածության և մահացության ցուցանիշների զգալի աճը, ինչպես նաև վերոնշյալ բնագավառներում մատուցվող ծառայությունների արդիականացման անհրաժեշտությունը` ՀՀ կառավարությունը նախատեսում է բարելավել արյունաբանական բնագավառում մատուցվող ծառայությունների որակը` արյունաբանական կենտրոնի արդիականացման և կենտրոնում ոսկրածուծի փոխպատվաստման նոր բաժանմունքի ստեղծման միջոցով: ՀՀ ԱՆ «Պրոֆ. Ռ. Հ. Յոլյանի անվան արյունաբանական կենտրոն» ՓԲԸ-ում, նաÖ ‡ ոսկրածուծի փոխպատվաստման ստեղծվող բաժանմունքում աշխատող բժիշկների համար կկազմակերպվեն համապատասխան վերապատրաստման դասընթացներ:

Գերատեսչության հիմնավորման համաձայն, ներկայում գործող բժշկական օգնություն և սպասարկում իրականացնող հաստատությունների ֆիզիկական վիճակը, առկա ենթակառուցվածքները չեն համապատասխանում արդի պահանջներին, բժշկական սարքավորումները հնամաշ են և կարիք ունեն արդիականացման: Հայաստանում արյունաբանական ոլորտում առայժմ ներդրված չեն բուժման միօրինականացված պրոտոկոլներ և ստանդարտներ: Վերջին տարիներին ՀՀ բնակչության շրջանում քաղցկեղով և արյունաբանական հիվանդություններով հիվանդացությունը նկատելիորեն աճել է: 2014 թ. 2005-ի համեմատ արձանագրվել է քաղցկեղով հիվանդացության շուրջ 31% աճ (198.8 -ից մինչև 277.6-ը` 100.000 բնակչի հաշվով): Օնկոհեմատոլոգիական հիվանդություններով հիվանդացությունը ևս զգալիորեն աճել է: Մասնավորապես, 2003 թ. գրանցվել է 10.8 հիվանդ` 100.000 բնակչի հաշվով, 2007 թ.` 15.3, 2009 թ.` 15.5, 2010 թ.` 16.4 հիվանդ, իսկ 2013 թ.` 16.2:

Զգալի վատթարացում է նկատվում նաև այլ վիճակագրական տվյալների առումով` քաղցկեղի տարածվածությունը վերջին տարիներին աճել է՝ 2004 թ. 0.83%-ից  հասնելով 1.28%-ի 2014 թ., իսկ մահացությունը  4.497 դեպքից  (139.9՝ 100.000 բնակչի հաշվով)  2004 թ. աճել է մինչև 5.685 դեպքի (188.63՝ 100.000 բնակչի հաշվով)` 2014 թ. մահացության պատճառների մեջ գրավելով երկրորդ տեղը սիրտ-անոթային հիվանդություններից հետո: Ներկայումս ՀՀ-ում ոչ վարակիչ հիվանդությունների պատճառով մահացության տոկոսն ամենաբարձրն է ընդհանուր մահացության կառուցվածում: