Երաշտն ընդգրկել է Հայաստանի և Վրաստանի տարածքի շուրջ 97%-ը

ՀԱՍԱՐԱԿՈՒԹՅՈՒՆ 25 Օգոստոս, 2025 23:36

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Երաշտն ընդգրկել է Հայաստանի և Վրաստանի տարածքի շուրջ 97%-ը, հաղորդել է Եվրոպական երաշտի դիտարանը (EDO): Այս երկրներում նկատվում է Եվրոպայում և Միջերկրական ծովում ամենաուժեղ երաշտի հետևանքները, օգոստոսի առաջին տասնօրյակում տուժել է տարածաշրջանների կեսից ավելին։

Դիտարանը տեղումների, հողի խոնավության և բուսականության վիճակը գնահատելու համար արբանյակային տվյալներ է կիրառում: Արդյունքները դասակարգվում են երեք մակարդակների՝ հսկողություն, նախազգուշացում և տագնապ, վերջինս ազդարարում է բուսականության անոմալ զարգացման մասին: Օգոստոսի սկզբին Եվրոպայի և Միջերկրական ծովի 7,8%-ը գտնվում էր տագնապի, 38,7%-ը՝ զգուշացման և 4,9%-ը՝ հսկողության մակարդակում։

Կովկասում և Բալկանյան թերակղզու հյուսիսում տուժել են նաև Բուլղարիան, Կոսովոն, Սերբիան, Հյուսիսային Մակեդոնիան, Ալբանիան, Հունգարիան և Չեռնոգորիան, որոնց տարածքի երեք քառորդը գտնվում էր զգուշացման կամ տագնապի մակարդակներում։

Հուլիսին և օգոստոսին այս տարածաշրջաններում ուժեղ ջերմային ալիքներ են եղել, որոնք բազմաթիվ անտառային հրդեհներ են առաջացրել, դրանց հետևանքով Չեռնոգորիայում և Ալբանիայում մեկական մարդ է զոհվել։

Իսպանիան, Պորտուգալիան և Իտալիան ներկայում երաշտի տեղայնացված հետևանքներ են կրում։ Մեծ Բրիտանիայում տարածքի 69,5%-ը և Ֆրանսիայի 63%-ը տուժել են երաշտից: Կենտրոնական Եվրոպայում, մասնավորապես՝ Գերմանիայում, Շվեյցարիայում, Ավստրիայում և Չեխիայում, նկատվել է բարելավում, հողի խոնավությունը և բուսականությունը վերադարձել են բնականոն վիճակի:

Ֆրանսպրեսի գնահատականներով՝ 2025 թվականին ԵՄ-ում հրդեհներն արդեն ոչնչացրել են ավելի քան մեկ միլիոն հեկտար տարածք, ինչը ռեկորդային բարձր ցուցանիշ է, հիմնվելով Եվրոպական անտառային հրդեհների տեղեկատվական համակարգի (EFFIS) տվյալների վրա:

Հետևեք մեզ՝ այստեղ