Անցյալը պետք է հիշել ոչ թե ատելության մեջ ապրելու, այլ ավելի լավ ապագա ստեղծելու և խաղաղության ջահը սերնդեսերունդ փոխանցելու համար. ՊՆ վարչության պետ

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Հայ և չին ժողովուրդներն 80 տարի առաջ հերոսաբար կռվեցին Երկրորդ համաշխարհային պատերազմի ճակատներում և տարան մեծ հաղթանակ ֆաշիզմի դեմ՝ այդպես փակելով մարդկության տարեգրության մութ էջերից մեկը։    

«Արմենպրես»-ի հաղորդմամբ՝ այդ կարծիքը հայտնեց ՀՀ ՊՆ պաշտպանական քաղաքականության և միջազգային համագործակցության վարչության պետ Լևոն Այվազյանը՝ ելույթ ունենալով ՀՀ-ում Չինաստանի դեսպանատանը կազմակերպված միջոցառման ժամանակ, որը նվիրված էր Երկրորդ աշխարհամարտում ճապոնական ագրեսիայի դեմ չինական և խորհրդային բանակների համատեղ հաղթանակի 80-ամյակին։ 

«Յուրաքանչյուր պետության պատմության մեջ կան իրադարձություններ, որոնք անջնջելի հետք են թողնում նրա ճակատագրի վրա։ Չին ժողովրդի համար նման իրադարձությունն, անշուշտ, հավերժ կմնա որպես հաղթանակ ագրեսորների դեմ Դիմադրության պատերազմում։ Չինական ճակատում ռազմական գործողությունների գլխավոր թատերաբեմի իրադարձությունների ժամանակ ճապոնական միլիտարիզմի հիմնական զինված ուժերը պարտություն կրեցին, ինչը թույլ տվեց ոչ միայն փրկել պետությունը և չին ժողովրդին կործանումից, այլև հզոր աջակցություն ցուցաբերել եվրոպական և խաղաղօվկիանոսյան ճակատներում կռվող դիմադրության ուժերին»,- ասաց Այվազյանը։ 

Նա հավելեց, որ չին ժողովուրդը մեծ հաղթանակի զոհասեղանին դրեց իր փառահեղ զավակների միլիոնավոր կյանքերը՝ կրելով մեծագույն կորուստներ։ 

«Չինաստանի անկախության համար մղված արյունալի մարտերում հայ ժողովրդի ներկայացուցիչները նույնպես հերոսաբար կռվեցին մեր չին եղբայրների հետ միասին, ինչը երկու ժողովուրդների դարավոր բարեկամության խորհրդանիշն է։ Առավել քան ուրախալի է, որ, հիմնվելով այդ բարեկամության, ինչպես նաև քաղաքական երկխոսության բարձր մակարդակի և փոխադարձ համաձայնության ու փոխըմբռնման վրա, այսօր Հայաստան-Չինաստան հարաբերությունները կրում են բազմակողմ բնույթ՝ ընդգրկելով հասարակական-քաղաքական, տնտեսական, մշակութային, պաշտպանական , կրթական և այլ բնագավառներ»,- ասաց ՀՀ Պն ներկայացուցիչը։ 

Նա հիշեցրեց, որ 2025 թվականի սեպտեմբերին Պեկինում կանցկացվի մեծ ռազմական շքերթ, և չին ժողովուրդը, ամբողջ աշխարհի ժողովուրդների հետ միասին, հանդիսավոր կերպով կնշի Չինաստանի ժողովրդի՝ Դիմադրության պատերազմում և Համաշխարհային հակաֆաշիստական պատերազմում տարած հաղթանակի 80-ամյակը։ Այվազյանը գոհունակությամբ նշեց, որ ՀՀ կառավարության պատվիրակությունը, վարչապետ Նիկոլ Փաշինյանի գլխավորությամբ, մասնակցելու է այդ նշանակալի իրադարձությանը, որն արտացոլում է երկու պետությունների միջև հաստատված քաղաքական երկխոսության բարձր մակարդակը։ 

«Պատմությունը հայելու նման է։ Անցյալի ողբերգությունների կրկնությունից խուսափելու միակ միջոցը դրա դասերը քաղելն է։ Անցյալը հնարավոր չէ փոխել, բայց մենք կարող ենք ստեղծել մեր ապագան։ Անցյալը պետք է հիշել ոչ թե ատելության մեջ ապրելու համար, այլ ավելի լավ ապագա ստեղծելու և խաղաղության ջահը սերնդեսերունդ փոխանցելու համար։ Ցանկացած վեճ պետք է լուծվի խորհրդակցությունների միջոցով։ Որպեսզի ձևավորվի համաշխարհային և տարածաշրջանային մակարդակներում գլոբալ գործընկերություն, պետք է օգտագործել միջպետական հարաբերությունների նոր մոտեցում, որտեղ առաջին պլան են դուրս գալիս երկխոսությունն ու գործընկերությունը, այլ ոչ թե բախումն ու բլոկային քաղաքականությունը»,- պարզաբանեց Այվազյանը։  

Նրա պնդմամբ՝ այսօր ոչ մի պետություն, որքան էլ հզոր լինի, ի զորու չէ միայն սեփական ջանքերով ապահովել իր բացարձակ անվտանգությունը, և ոչ մի երկիր չի կարող կայունության հասնել այլ երկրներում անկայունության հաշվին։ 

Հետևեք մեզ՝ այստեղ