«Մի քանի ժամով մենք իսկապես զգացինք Հայկոյին մեր կողքին». «Սիմֆոնիկ Հայկո» համերգի տպավորությունները

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Օգոստոսի 31-ին Գառնի պատմամշակութային արգելոց թանգարանում  կայացավ «Սիմֆոնիկ Հայկո» խորագրով համերգը՝ նվիրված Հայկոյի հիշատակին:

Համերգին ելույթ են ունեցել Էրիկ Կարապետյանը, Սոնա Ռուբենյանը, Մաշա Մնջոյանը, Սյուզաննա Մելքոնյանը, Բրյունետը, Սեդա Սեյրանյանը, Ներսես Ավետիսյանը, Լիպարիտ Ավետիսյանը, Մարիո Ստեֆանո Պիետրոդարկին և այլք:

Երեկոյի ընթացքում հանդես է եկել Հայաստանի պետական սիմֆոնիկ նվագախումբը (գեղարվեստական ղեկավար և գլխավոր դիրիժոր՝
Սերգեյ Սմբատյան):

Համերգից հետո ընկերները կիսվել են հույզերով ու տպավորություններով: Մոդել, հաղորդավար Լուսինե Թովմասյանն իր ֆեյսբուքյան էջում գրել է.

«Սա պարզապես համերգ չէր: Մի քանի ժամով մենք իսկապես զգացինք Հայկոյին մեր կողքին՝ նրա ստեղծած անմահ երգերի միջոցով: Գառնու տաճարի մոգական միջավայրը և սիմֆոնիկ նվագախմբի հնչյունները համադրվեցին այնպես, որ ամեն ակնթարթ լի էր հիշողություններով ու զգացմունքներով»:

Արսեն Սաֆարյանն իր ֆեյսբուքյան էջում գրել է.

«Հայկոյին նվիրված համերգն էր, Հայկոյի համերգը, մեր Հայկոյի... Դիրիժոր Սերգեյ Սմբատյանի գլխավորած Հայաստանի Պետական Սիմֆոնիկ նվագախմբի հեքիաթային հնչյուններով ողողված էին Գառնի չքնաղ տաճարի հրապարակն ու շրջակայքը։ Բեմում, հրաշալի ձայներ էին, հրաշալի արտիստներ, որոնք ներկաներին ապրեցնում էին Հայկոյի անմահ երգերով։ Ուղղակի հրաշալի էր. ես համոզված եմ, որ Հայկոն այնտեղ էր ու ժպտում էր մեզ վերևից»:

«Քո երգերը հավերժ են»,- ինստագրամյան իր էջում գրել է Էրիկ Կարապետյանը:

Իր հույզերով կիսվել է նաև երգչուհի Սոնա Ռուբենյանն, ով կատարել է Հայկոյի «Վերև» ստեղծագործությունը:

«Սիրտս տեղից դուրս էր գալիս…
Հայկոյի «Վերևը» միշտ առանձնահատուկ տեղ ունի իմ սրտում:
Հայկո ջան, դու ապրում ես քո երգերում ու մեր սրտերում»,- գրել է երգչուհին:

«Դա պարզապես երաժշտական երեկո չէր, այլ հիշատակի ու սիրո խորհրդանշական արարողություն՝ նվիրված մի մարդու, որի երգերը հավերժ մեր սրտերում են։ Եթե ճիշտ եմ հիշում, սա նրանց արդեն երրորդ նախագիծն է ոգեշնչված երգիչ, կոմպոզիտոր Հայկո Հակոբյանի ստեղծագործություններով։ Մթնշաղը, լուսավորված բեմը և երաժշտության հզոր հնչյունները ստեղծում էին մթնոլորտ, որը բառերով գրեթե անհնար է ամբողջությամբ փոխանցել։ Իմ ինստագրամյան էջում պատմությունների շարքում պահպանված է այդ պահերի մի մասը»,- գրել է բլոգեր Կամո Թովմասյանը: