Իշխանություններին մտահոգո՞ւմ է հանրաքվեի վերաբերյալ ԵԱՀԿ ԺՀՄԻԳ-ի քննադատությունները. մեկնաբանում է Կարինե Աճեմյանը

ԵԱՀԿ-ի Ժողովրդավարական հաստատությունների և մարդու իրավունքների գրասենյակի փորձագիտական խումբը հրապարակել է Հայաստանում անցկացված սահմանադրական փոփոխությունների հանրաքվեի վերաբերյալ վերջնական զեկույցը: ԵԱՀԿ ԺՀՄԻԳ-ի զեկույցում կան բազմաթիվ քննադատություններ՝ հանրաքվեի կազմակերպման հետ կապված:

Past.am-ն ԱԺ ՀՀԿ խմբակցության պատգամավոր Կարինե Աճեմյանից փորձեց ճշտել՝ որքանո՞վ են իշխանությունները մտահոգ այդ գնահատականներից: Պատգամավորն ասաց. «Գիտեք, մենք բոլոր հայտարարություններն ու մտահոգությունները լսում ենք , որովհետև իշխանություններին ամենաշատն է հետաքրքրում թափանցիկ ու առանց կեղծիքների ընտրությունների անցկացումը: Հիմա աշխատանք է գնում ընտրական օրենսգրքի վրա: Մենք ավելի ու ավելի հակված ենք , որ 2017-ին չկրկնվեն նախորդ ընտրությունների թերությունները»:

Տիկին Աճեմյանի խոսքով՝ ընտրությունից ընտրություն ՀՀԿ-ն և իշխանությունները ոչ միայն խոսում են դրա մասին, այլև ամեն ինչ անում են, որպեսզի ընտրակեղծարարությունները տեղ չգտնեն այլևս:

Ըստ նրա՝դրա համար պետք է մեխանիզմներ գտնել, ընտրական նոր օրենսգիրքը այնպիսի տեսքով ներկայացնել, որպեսզի կեղծիքները մինիմալի հասցվեն: Ինչ վերաբերում է այն հայտարարությունը, թե պաշտոնյաները չարաշահում են իրենց լծակները քարոզչությունն իրակացնելիս, Աճեմյանը պատասխանեց. «Երևի կարդացել եք նախագահի մամուլի խոսնակի հայտարարությունը, որ պաշտոնյաները չեն զբաղվել ընտրական գործընթացներով իրենց աշխատանքային ժամերին:

Որևէ խախտում այստեղ չկա: Մնացած խախտումների մասին, իհարկե, մենք էլ ժամանակին խոսել ենք և հետագայում պետք է այնպես անենք, որ բացառենք դրանք»:

Լևոն Փանոսյան