Վրաստանի պաշտպանության ձերբակալված նախկին նախարարն ուղեղի ցնցումով տեղափոխվել է հիվանդանոց

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Վրաստանի պաշտպանության ձերբակալված նախկին նախարար Ջուանշեր Բուրչուլաձեն ուղեղի ցնցման ախտորոշմամբ տեղափոխվել է հիվանդանոց։ Դրա մասին հայտնել են Վրաստանի Պետական ​​անվտանգության ծառայությունից, հաղորդում է Новости-Грузия-ն։

Նշվում է, որ նախկին պաշտոնյան մի քանի օր առաջ վնասվածք է ստացել՝ Կախեթիում քվադրոցիկլից ընկնելով։ Քանի որ բժիշկը Բուրչուլաձեին նշանակել էր անկողնային հանգիստ, Պետական անվտանգության ծառայությունում չեն առարկել նրան բուժհաստատություն տեղափոխելու խնդրանքին։

«Կալանավորման ժամանակ Ջուանշեր Բուրչուլաձեն հայտարարել է, որ մի քանի օր առաջ Կախեթիում քվադրոցիկլից ընկել է և թեթև ուղեղի ցնցում ստացել, որի կապակցությամբ բժիշկը նրան անկողնային հանգիստ է նշանակել և խնդրել տեղափոխվել բժշկական հաստատություն»,- ասվում է գերատեսչության հայտարարության մեջ։

Բուրչուլաձեն պաշտպանության նախարարի պաշտոնը զբաղեցրել է 2021 թվականի փետրվարի 22-ից մինչև 2024 թվականի փետրվարի 8-ը։ Նա Իրակլի Ղարիբաշվիլիի կառավարության անդամ էր, որը հրաժարական տվեց վարչապետի պաշտոնից կոռուպցիայի մեղադրանքների պատճառով և այս գարնանը հայտարարեց քաղաքականությունից հեռանալու մասին։

Վրաստանի պետական ​​անվտանգության ծառայությունից հայտնել են, որ Բուրչուլաձեն ձերբակալվել է պաշտոնեական լիազորությունների չարաշահման և առանձնապես խոշոր չափերի փողերի լվացման մեղադրանքներով։

Բուրչուլաձեն մեղադրվում է «պաշտոնական դիրքն օգտագործելով փողերի լվացման, որը ներառում է առանձնապես խոշոր չափերի եկամուտ ստանալը» և «պետական ​​և քաղաքական պաշտոն զբաղեցնող անձի կողմից պաշտոնեական լիազորությունների չարաշահման» մեջ։ Նրան սպառնում է 9-12 տարվա ազատազրկում։

Հետևեք մեզ՝ այստեղ