«Շտապիր սիրել». պրեմիերա նորաբաց թատրոնում. նոր մտքեր և մեծ երազանքներ Հրազդանում

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Հրազդանի նորաբաց Կամերային թատրոնն առաջին անգամ իր դռները բացեց սեպտեմբերի 10-ին՝ ներկայացնելով Հերման Ռաուչեռի «Շտապիր սիրել» պիեսը։ Ներկայացման ռեժիսորը Արմեն Մարգարյանն է։  

«Երբեմնի երազանքը այլևս իրականություն է։ Այդ խենթ գաղափարով ինձ վարակել է թատրոնի հիմնադիր Շահեն Փանոսյանը։ Ես ընտրեցի այն ստեղծագործությունը, որին ծանոթ էի վաղուց, հրավիրեցի դերասաններին, ու խենթությունը տարածվեց»,- Tert.am Life-ի հետ զրույցում պատմեց Արմեն Մարգարյանը։

Առաջնախաղը կայացավ լեփ-լեցուն դահլիճում։

«Հանդիսատեսի աննկարագրելի ջերմ ընդունելիությունից ենթադրում եմ, որ ներկայացումը կայացել է։ Մինչ առաջնախաղը նշում էի, որ հանդիսատեսը սիրո չափաբաժին է տանելու իր հետ, և այդպես էլ եղավ»,- նշեց ռեժիսորը։

Արմեն Մարգարյանի խոսքով՝ Հերման Ռաուչեռի պիեսն իրեն գրավել է իր անմիջականությամբ, բազմաշերտ երկխոսություններով, ազատամտությամբ և խորությամբ։

«Գրեթե մեկ դար առաջ գրված այս գործը այսօր էլ արդիական է, որովհետև քարոզում է բացարձակ սեր։ Խորապես համոզված եմ, որ մենք հաճախ չենք գնահատում մեզ տրված ժամանակը։ Ընկնում ենք ձևի ետևից՝ մոռանալով ամենակարևորը՝ բովանդակությունը։ Շատ հաճախ մարդկանց իրական կշիռը զգում ենք այն ժամանակ, երբ նրանք արդեն չեն լինում։ Կյանքում պետք է կարևորել սիրելի մարդկանց հետ անցկացրած յուրաքանչյուր վայրկյանը։ Ահա թե ինչի մասին է մեր «Շտապիր սիրել» ներկայացումը»,-ընդգծեց նա։

Դերասանական կազմում են Հայկ Պետրոսյանը, Էլեն Գևորգյանը և Անդրանիկ Անտոնյանը։ Ռեժիսորի խոսքով՝ անձուգական են բոլորը, յուրաքանչյուրն իր տեղում, լրացնելով մեկը մյուսին։

«Փորձերի ժամանակ կատարյալ երանություն էի ապրում հետևելով, թե ինչ բարձրակարգ վարպետություն էին ցուցադրում ընկերներս բեմի վրա։ Շատ կարևոր է, թե ով է մատուցելու քո գաղափարը։ Մեր պարագայում ընտրությանս մեջ չեմ վրիպել։ Շնորհակալ եմ նրանց քրտնաջան աշխատանքի համար։ Մեր ստեղծագործական խմբում են նաև պարուսույց Անի Դավթյանը և բեմանկարիչ Լիան Թորոսյանը։ Անիի հետ միասին աշխատել ենք մեկ այլ բեմադրությանս շուրջ։ Խոսքը Թատրոն Տանիքի «Քեզ համար» ներկայացման մասին է, որտեղ հասկացա, որ գտել եմ գաղափարակից ընկեր։ Անսահման տաղանդի և երևակայության մարմնավորում։ Յուրաքանչյուր աննշան շարժմանը նա կարողանում է հոգի հաղորդել։ Նրա աշխատանքը ես անվանում եմ ոչ թե պար, այլ հոգևիճակի վերատադրություն շարժման միջոցով։ Բեմանկարիչ Լիան Թորոսյանը իմ այս տարվա ձեռքբերումներից է»,- անկեղծացավ Արմեն Մարգարյանը:

Մինչև ներկայացման պրեմիերան Tert.am Life-ը զրուցել էր դերասաններ Հայկ Պետրոսյանի, Էլեն Գևորգյանի և թատրոնի հիմնադիր Շահեն Փանոսյանի հետ:

«Թատրոնը կունենա հատուկ դիմագիծ, հատուկ խոսք ու հատուկ պահանջներ։ Այն ժամանակակից դետալներ է պարունակում և հասարակության մեջ նոր հետաքրքրություններ կառաջացնի։ Սա մեր երազանքն էր, և հիմա այն իրականացավ»,- պատմել էր Շահեն Փանոսյանը:

Լուսանկարները՝ Ավետիք Հակոբյանի

Հետևեք մեզ՝ այստեղ