Քաղաքական իրադարձությունները երեկ

Տիգրան Խաչիկյանը ֆեյսբուքյան իր էջում գրում է.

ՌԴ Պետդումայի Կոմունիստական կուսակցության պատգամավորներ Վալերի Ռաշկինն ու Սերգեյ Օբուխովը դիմել են ՌԴ նախագահ Վլադիմիր Պուտինին եւ արտգործնախարար Սերգեյ Լավրովին՝ առաջարկելով խզել 1921թ. մարտի 16-ին ՌԽՖՍՀ իշխանությունների եւ Թուրքիայի միջեւ կնքված եղբայրության եւ բարեկամության մասին պայմանագիրը:

Ըստ այդ պայմանագրի համաձայն՝ Թուրքիային է անցել Կարս մարզի մեծ մասը, նախկին Բաթումիի մարզի հարավային հատվածը, Երևանի նահանգի Սուրմալուի գավառը՝ Արարատ լեռան հետ։

«Քաղաքացիական պայմանագիր» կուսակցությունը 2017 թվականի խորհրդարանական ընտրություններին մասնակցելու է սեփական ցուցակով՝ առանց նախընտրական դաշինքի: Այս մասին «Քաղաքացիական պայմանագիրը» որոշում է կայացրել քաղաքական խորհրդի նիստում՝ քննարկելով 2017 թվականի խորհրդարանական ընտրություններին մասնակցելու ձևաչափի հարցը:

Թուրքիայի նախագահ Ռեջեփ Թայիփ Էրդողանը քննադատել է ՌԴ նախագահ Վլադիմիր Պուտինին՝ նրան անվանելով ըստ էության օկուպանտ։ էրդողանն այդ կերպ արձագանքել է Հալեպի մոտակայքում Բաշար Ասադի բանակի հաջողություններին, ինչը ակնհայտ իր սրտով չէր:Սիրիայի կառավարական բանակը Ռուսաստանի ռազմատիեզերական ուժերի օգնությամբ Հալեպում ճեղքել է ապստամբների դիրքերը։ Էրդողանը այդ փաստից վրդովված դիմել է Պուտինին. «Ի՞նչ եք դուք անում Սիրիայում։ Ըստ էության, Դուք օկուպանտ եք»

Հայաստանի համար անակնկալ է եղել ԵԽԽՎ-ի վերջին նստաշրջանում հակահայկական երկու բանաձևերին սերբական պատվիրակության գրեթե բոլոր անդամների աջակցելու փաստը: Այս մասին, պաշտոնական այցով Հայաստան ժամանած Սերբիայի խորհրդարանի նախագահ Մայա Գոյկովիչի հետ հանդիպման ժամանակ նշել է ՀՀ Ազգային ժողովի նախագահ Գալուստ Սահակյանը՝ հավելելով, որ դա հակասում է մեր երկրների միջև բազմամյա բարեկամական հարաբերությունների ոգուն, ինչպես նաև Սերբիայի պաշտոնական դիրքորոշմանը Ղարաբաղյան հիմնախնդրի վերաբերյալ:

Երկու օր տևած հորդառատ անձրևներից հետո թուրքական Դիարբեքիր քաղաքի կենտրոնում վերսկսվել են լարված մարտերը բանակի և քուրդ ակտիվիստների միջև: Թուրքական քրդերի «մայրաքաղաք» համարվող Դիրաբեքիր քաղաքի կենտրոնում է գտնվում պատմական Սուրի շրջանը: Այնտեղ մի քանի ճարտարապետական հուշարձան կա, մասնավորապես, այն շրջապատված է մի քանի կիլոմետրանոց ամրոցապարսպով, որի որոշ հատվածներ վերագրվում են մ.թ.ա. 4-րդ դարին: Ամրոցի ներսում հինավուրց եկեղեցիներ և մզկիթներ կան, որոնք մոտավորապես 1.500 տարեկան են:

Երեկ վաղ առավոտից Ռուսաստանի զինված ուժերի Հարավային ռազմական օկրուգի բոլոր ռազմակայաններում, այդ թվում՝ Գյումրիում տեղակայված ռուսական 102-րդ ռազմաբազայում անակնկալ ստուգումներ են սկսվել։ Այս մասին հայտնել է Ռուսաստանի պաշտպանության նախարար Սերգեյ Շայգուն։

«Այս պահի դրությամբ Զարուհի Փոստանջյանն ու Հանրապետականի թեկնածու Արման Թաթոյանն են ներկայացրել փաստաթղերը։ Այլ թեկնածուից որևէ փաստաթուղթ դեռ չկա»
Ներկայումս ՀՅԴ-ն, ՕԵԿ-ը և ՀԱԿ-ը թեկնածու չեն առաջադրել։ ՕԵԿ-ը հայտարարել է, որ պաշտպանելու է Զարուհի Փոստանջյանի թեկնածությունը։

«Լուսավոր Հայաստան» կուսակցության խորհրդի նախագահ, ՀՀ ԱԺ պատգամավոր Էդմոն Մարուքյանը հանդես է եկել օրենսդրական նախաձեռնությամբ, ըստ որի ՀՀ տնտեսական մրցակցության պաշտպանության պետական հանձնաժողովի (ՏՄՊՊՀ) նախագահն այլևս չի կարող լինել կուսակցական, ինչպես հիմա է: