Մութ գործ՝ բազմաթիվ հարցականներով. «Փաստ»

«Փաստ» օրաթերթը գրում է.

bloknot.ru–ն «Ծխեց, փախավ և մահացավ զուգարանում» վերնագրով հոդվածում գրում է, որ խորհրդավոր կերպով մահացել է 43-ամյա Բորիս Ավագյանը՝ Պետական գույքի կառավարման դաշնային գործակալության նախկին պաշտոնյան: Նա հետաքննության տակ էր միլիարդավոր ռուբլիների մաքսային տուրքերի հափշտակության խմբակային գործով։ Ավագյանը, որը նաև հայկական անձնագիր ուներ, փորձել էր խուսափել դատավարությունից՝ զինվորագրվելով հատուկ նշանակության զորքերին, սակայն չէր գնացել ռազմաճակատ։ Վերջիվերջո, սեպտեմբերի 23-ին ռազմական ոստիկանությունը, վերաբացելով Ավագյանի՝ ծառայել չցանկանալու գործը, նրան տարել էր Սանկտ Պետերբուրգի դատարան՝ հստակ կալանավորելու նպատակով։ Սակայն Ավագյանը թույլտվություն էր խնդրել դուրս գալ ծխելու (!), նստել էր իրեն սպասող մեքենան և թռել դեպի Հայաստանի հյուպատոսություն, որտեղ թաքնվել էր դռների հետևում։ Ռուսաստանի անվտանգության ուժերը ստիպված էին մնալ աստիճանների վրա. դիվանագիտական նորմերի համաձայն, հայկական տարածք համարվող հյուպատոսություն ներխուժելը հավասարազոր է այդ երկրի վրա անմիջական հարձակման։ Ավագյանի խնդիրները ռուսական օրենսդրության հետ առաջացել են ավելի քան 4,2 միլիարդ ռուբլի մաքսային վճարումներից խուսափելու մեղադրանքներից հետո: «Սխեմաների» վարպետ պաշտոնյան, ըստ քննիչների, արտասահմանից Ռուսաստան էր ներմուծել տարբեր սարքավորումներ՝ դրանք հայտարարագրելով որպես էժան շինանյութեր: Ավագյանը նախկինում տնային կալանքի տակ էր Ռուսաստանում, որտեղից փախել էր Ֆրանսիա: Նա նաև հրաժարվել էր Ռուսաստանի քաղաքացիությունից 2018 թվականին՝ տեղափոխվելով աշխատանքի Լեռնային Ղարաբաղ, որը դեռևս չէր նվաճվել Ադրբեջանի կողմից: 2021 թվականից Ավագյանը կրկին հայտնվել էր Ռուսաստանում: Եվ այսպես, արդյունքում՝ «արագ փախուստ» դատարանից, Հայաստանի հյուպատոսարանում թաքնվել և խորհրդավոր մահ: Նախնական տեղեկությունների համաձայն, Ավագյանը, ենթադրաբար, ինքնասպան է եղել:

«Ողբերգական դեպք, ոչ ոք մեղավոր չէ», - հեգնում են մեկնաբանները: Հրապարակախոս Սերգեյ Կոլ յասնիկովը կարծում է, որ Ավագյանի «կամավոր ինքնասպանությունը» հավանաբար կազմակերպված է եղել արտաքին օգնությամբ: «Նրա մահը ծածկել է բոլոր անորոշությունները. չէ՞ որ հնարավոր է, որ նա հույս ուներ պաշտպանություն գտնել հյուպատոսարանում այն մարդկանցից մեկից, որոնց հետ «գործ էր անում»: Նա օգնել է Հայաստանից ինչ-որ մեկին՝ գողանալ 4,2 միլիարդ ռուբլի ռուսական հարկերից, և մտածել է, որ իր հետ լավ կվարվեն և կպաշտպանեն։ Դե, նրանք էլ ծածկել են նրան՝ սավանով։ Ըստ էության, Հայաստանի քաղաքացին սպանվել է Հայաստանի հյուպատոսարանում։ Հզոր է։ Եթե նա մնար Ռուսաստանում, ավելի երկար կապրեր»,– ասել է Կոլ յասնիկովը։

Ամփոփելով՝ ասենք. պարզ է, որ սա մութ գործ է։ Ինքնասպանություն գործելու համար պարտադիր չէր հասնել Հայաստանի հյուպատոսարան։ Մահից որոշ ժամանակ առաջ Ավագյանն իր սոցիալական ցանցի էջում լուսանկար էր հրապարակել մի գեղեցիկ կնոջ (հավանաբար՝ իր կնոջ) հետ կից մակագրությամբ. «Ազատ և անպարտելի։ Ինչպես միշտ»։ Ի վերջո, Ավագյանը ո՛չ ազատություն, ո՛չ էլ հաղթանակ գտավ Հայաստանի հյուպատոսարանում։

Մանրամասները՝ «Փաստ» օրաթերթի այսօրվա համարում