«Անտանելի» ներկայացումը՝ «Հայ ֆեստ»-ի շրջանակում. հաջորդ տարի այն Հայաստանը կներկայացնի Էդինբուրգի փառատոնում

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

«Հայ ֆեստ» թատերական փառատոնի շրջանակում այսօր՝ հոկտեմբերի 4-ին, Գաբրիել Սունդուկյանի անվան ազգային ակադեմիական թատրոնի փոքր բեմում կցուցադրվի «Անտանելի» ներկայացումը, որը բազմադիսցիպլինար ներկայացում է: Այն ծնվել է մասնակիցների պատմություններից և ստեղծվել է hosq-ի Études Lab-ում: Բաժանված լինելով չորս մասի՝ այն անդրադառնում է աքսորի, շրջակա միջավայրի ակտիվիզմի, սոցիալական ճնշման, թվայնացման և կանացի մարմնի՝ որպես պայքարի և դիմադրության տարածքի թեմաներին: Միասին դրանք միաձուլվում են մեկ բառի շուրջ՝ «անտանելի»:

Ներկայացման գեղարվեստական ղեկավարն է Études Lab-ի համադրողներից «Միհր» թատրոնի գեղարվեստական ղեկավար Ցոլակ Մլքե Գալստյանը։ Լաբորատորիայից հետո ներկայացումը ստացել է ավելի զարգանալու հնարավորություն, և առավել թարմացված տեսքով ցուցադրվելու է «Հայ ֆեստ»-ին։ Բացի այդ, այս տարի աշխարհի լավագույն փառատոններից մեկը համարվող Էդինբուրգի միջազգային ամենամյա փառատոնին «Միհր» թատրոնը ներկայացել է «Պանդխտության երգը» ներկայացումով։ Ձեռք է բերվել պայմանավորվածություն, որպեզի «Անտանելի»-ն, որում նաև ներգրավված են մասնակիցներ «Միհր» թատրոնից, հաջորդ տարի ներկայացվի Էդինբուրգի միջազգային փառատոնին։

«Այս ներկայացումը մեր լաբորատորիայում ծնվել է մարդկային իրական պատմություններից։ Մենք փորձել ենք ձև տալ այն զգացողություններին, որոնք շատ հաճախ մնում են ներսում՝ չարտահայտված։ «Անտանելի»-ն այն մասին է, թե ինչպես է մարդը գոյատևում ճնշումների ներքո, ինչպիսի պատասխաններ է գտնում թվայնացման ու անորոշ ապագայի պայմաններում, ինչպես է կանացի մարմինը վերածվում պայքարի ու դիմադրության տարածքի։ Մենք հավատում ենք, որ, եթե այսօր ունենք համարձակություն բարձրաձայնելու այն, ինչ թվում է անտանելի, դա նշանակում է, որ արվեստը շարունակում է լինել մեր գոյության ամենահզոր ուժը»,-Tert.am Life-ի հետ զրույցում նշեցին ներկայացման հեղինակները։

Հետևեք մեզ՝ այստեղ