Ի՞նչ թվեր էր ներկայացնում Փաշինյանը, որոնց հետ համաձայն չէր ՌԴ նախագահը

«Կարևոր չէ, թե ինչպես կքվեարկեն, կարևոր է, թե ինչպես կհաշվեն» (Նապոլեոն III)

Դուշանբեում կայացած ԱՊՀ գագաթաժողովի ընթացքում Հայաստանի վարչապետ Նիկոլ Փաշինյանի և Ռուսաստանի նախագահ Վլադիմիր Պուտինի միջև ծավալվել էր բանավեճ՝ հայ–ռուսական առևտրաշրջանառության թվերի շուրջ։

Պուտինի հարցին, թե որքան է կազմել երկու երկրների միջև առևտրաշրջանառությունը, Փաշինյանը պատասխանել է, որ 2025 թվականին այն կազմել է 4 մլրդ դոլար, իսկ 2024-ին՝ 9 մլրդ։ Սակայն Ռուսաստանի նախագահը համաձայն չի եղել և նշել է, որ իրական ցուցանիշները «ավելի մեծ են»։

«Դե, կարող է լինել»,– արձագանքել է Փաշինյանը։

Դրանցի հետո քպական պաշտոնյաներն ու պատգամավորները, իրար հերթ չտալով, փորձում էին ցույց տալ, թե Փաշինյանը չի սխալվել, համադրել է համադրելի թվերը և այլն: Մեր ուսումնասիրությունները ցույց տվեցին ուշագրավ պատկեր:

 Ըստ Հայաստանի վիճակագրական կոմիտեի պաշտոնական տվյալների, 2024 թվականին Հայաստանի և Ռուսաստանի միջև առևտրաշրջանառությունը կազմել է 12 մլրդ 401 մլն 604,4 հազար դոլար։ Այսպիսով, 2024 թվականը դարձել է պատմական առավելագույնը՝ գրանցելով գրեթե կրկնակի աճ 2023 թվականի համեմատ։ Միաժամանակ, ըստ 2025 թվականի օգոստոսի տվյալների, իրական առևտրաշրջանառությունը կազմել է մոտ 4,5 մլրդ դոլար, մինչդեռ 2024 թվականի նույն ժամանակահատվածում այն կազմել էր 9,2 մլրդ դոլար։ Այսինքն, Փաշինյանը փաստացի «կրճատել է տարին՝ մինչև ութ ամիս»՝ շփոթելով թվերը և համեմատելով ոչ թե տարեկան, այլ ութամսյա ցուցանիշները։