Ով է ձերբակալված Տեր Փառեն քահանա Առաքելյանը․ ինչով է հայտնի

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Քիչ առաջ հայտնի դարձավ, որ ձերբակալվել է Սաղմոսավանքի հոգևոր հովիվ Տեր Փառեն քահանա Առաքելյանը։

ArmLur.am-ը պարզեց, որ Տեր Փառեն քահանա Առաքելյանը բավականին ընդդիմադիր հայացքներ է ունեցել, հաճախ է քննադատել իշխանություններին։

Այսպիսով, ո՞վ է ձերբակալված հոգևորականը․

Տ. Փառեն քահանա (Անդրանիկ) Առաքելյանը ծնվել է 1984 թվականի մարտի 7-ին Վարդգես Առաքելյանի և Ռուզաննա Ստեփանյանի ընտանիքում:
Միջնակարգ կրթությունը ստացել է 1991-2001 թվականներին Արմավիրի մարզի Ֆրանց Վերֆելի անվան դպրոցում, ապա կրթությունը շարունակել Սևանի Վազգենյան հոգևոր դպրանոցում:
2005-2007 թվականներին ուսանել է Էջմիածնի Գևորգյան հոգևոր ճեմարանում՝ ստանալով «Աստվածաբանության մագիստրոսի» կոչում:
2006 թվականի հոկտեմբերի 8-ին ձեռնադրվել է սարկավագ Տեր Փառեն եպիսկոպոս Ավետիքյանի կողմից:
2008 թվականի նոյեմբերի 9-ին Տեր Սահակ եպիսկոպոս Մաշալյանի կողմից ձեռնադրվել է քահանա:
2009 թվականի հունվարի 19-ից Շիրակի թեմի Ամասիայի տարածաշրջանի հոգևոր հովիվն է:
Ամուսնացել է 2004 թվականին. ունի մեկ զավակ: Տիրապետում է ռուսերեն և անգլերեն լեզուներին:
Տ. Փառեն քահանա Առաքելյանին 2013 թվականի փետրվարի 5-ին շնորհվել է քահանայական լանջախաչ:
2016 թվականից Արագածոտնի թեմի, Աշտարակ քաղաքի Սբ. Մարիանե եկեղեցու հոգևոր հովիվն է:

Տեր Փառեն քահանա Առաքելյանը հաճախ է հանդես գալիս ելույթներով և հրապարակումներով ցույց է տվել իր ընդդիմադիր հայացքները, որն արտահայտել է հետևյալ հրապարակման մեջ․

«Ձեզ հաջողվել է…
… հայհոյանքը բերել մարդկանց կյանք
… խնջույքը վերածել վեճի
… սուտը փաթեթավորել և հրամցնել
… պարտվել
… երկիր կորցնել, հայրենիք կորցնել
… բարերար, հոգևորական, հայրենասեր և հայրենանվեր մարդկանց ձերբակալել
… հարձակվել Մայր Աթոռի վրա
… Աստծո անունը զուր տեղը տալ և թույլ տալ, որ մարդիկ այդկերպ վարվեն
… բազմաթիվ եկեղեցիներ, վանքեր, մատուռներ կորցնել և թույլ տալ, որ անարգվեն մեր սրբությունները
… այնպես անել, որ մայրը չկարողանա այցելել իր զավակի շիրիմին. փոխարենը մայրերը Խաչքարի առջևը դրված ծաղկամանով և խնկամանով են փորձում սփոփվել, որ այդպես էլ չեն սփոփվում
… արժանապատիվ հոգևորականին, բժշկին, գիտնականին, զինվորականին, մարզիկին նեղացնել և փորձել արժեզրկել
… հարյուրավոր գերիներ ունենալ և հեռվից նայել, թե ինչպես են թշնամու դատարանում դատում երկրի առաջնորդներին։

Հ. Գ. Իրականում ձեզ ոչինչ էլ չի հաջողվել։

ՁԵԶ ՀԱՋՈՂՎԵԼ Է ՁԱԽՈՂՎԵԼ»,- գրել է նա։

Հետևեք մեզ՝ այստեղ