Այս քրեական վարույթն ի վերջո կարճվելու է, մոռացվելու է. փաստաբանը՝ Սամվել Կարապետյանի կալանքի երկարաձգման միջնորդության ելքի մասին

Բնականաբար, այն ելքը ընդունելի կլիներ, եթե կալանքի ներկայացված միջնորդությունը, որ արդեն երկրորդ երկարաձգման միջնորդությունն էր ընդհանրապես մերժվեր՝ հիմնավոր կասկածի բացակայությամբ: Իսկ այն, որ այս քրեական վարույթն ի վերջո կարճվելու է, մոռացվելու է,  իր վախճանն է ունենալու, այդտեղ երկրորդ կարծիք չկա:
Այս մասին «Մեր ձևով» շարժման հանրահավաքից առաջ լրագրողների հետ զրույցում, խոսելով գործարար, բարերար Սամվել Կարապետյանի կալանքի երկարաձգման միջնորդության ելքի մասին, ասել է փաստաբան Արամ Վարդևանյանը:

«Դուք, որ պատկերացնեք, ի վերջո դատարանը գտել է, որ հիմնավոր կասկածը երեք դրվագներից միայն մեկով է հաստատվե,լ և դա հայտնի հարցազրույցի քրեական վարույթն է, որտեղ պարզապես հնչել էր՝ «Մեր ձևով կմասնակցենք եկեղեցու պաշտպանությանը», ի վերջո, դա ո՞նց կարող է քրեական վարույթի հարց լինել»,- ասել է Վարդևանյանը:  

Լրագրողների այն հարցին, որ նոր մեղադրանքներ են ներկայացվել, Վարդևանյանը պատասխանել է. «Որոնցից ոչ մեկով հիմնավոր կասկածը չի  հաղթահարվել: Հիմնավոր կասկածն ապացուցման բավականին ցածր շեմն է և չնայած դրան, տնտեսական բնույթի ենթադրյալ հանցանքների ամբողջ խումբն ընդհանրապես հիմնավոր կասկածի ապացուցման շեմը չէր հաղթահարել, բայց ամենազարմանալին որն է, որ ի վերջո 50-ից ավել քննիչներ ներգրավված են Սամվել Կարապետյանի քրեական վարույթում: Իրենք գալիս են դատարան՝ խնդրելով ժամանակ, որ լրացուցիչ գործողություններ կատարեն, սա արդեն աբսուրդ է»:

Փաստաբանը հավելել է. «Եթե հարցնեք ինչ գործողոթյուններ են անում՝ պարզ չէ, մենք չենք հասկանում: Հերթական նիստին, որ հարցնում ենք, ոչ մի պատասխան չենք ստանում: Սամվել Կարապետյանին վերաբերող որևէ գործողություն չի կատարվել: Դատարանը նաև դիտարկեց այն տվյալը, որ մենք այս ժամանակահատվածում 3-4 անգամ դիմել էինք քննիչներին, որ Սամվել Կարպետյանին վերաբերող գործողություն անեն: Չեն կատարել»: