Անչափահաս է կալանավորվել. ի՞նչ է հայտնի

Հոկտեմբորի 20-ին Գյումրիում լարված իրավիճակ էր։ Վարդան Ղուկասյանի աշխատասենյակում ԱԱԾ աշխատակիցները խուզարկություններ էին իրականացնում, իսկ ավելի ուշ հայտարարեցին նրան ձերբակալելու մասին։ 

Մինչ քաղաքապետի աշխատասենյակում խուզարկություն էր իրականացվում, շենքի բակում լարված իրավիճակ էր, որն ավարտվեց իրավապահների և քաղաքացիների բախմամբ. բերման ենթարկվեցին մի շարք քաղաքացիներ։

MediaHub-ի ուղիղ եթերից պարզ դարձավ, որ բերման ենթարկվածների թվում կա նաև անչափահաս: Վերջինիս ձերբակալությունը բուռն քննարկումների առարկա դարձավ համացանցում։ Կարմիր բերետավորները կոպիտ ուժի գործադրմամբ ձերբակալեցին նրան:

MediaHub-ի տեղեկություններով՝ անչափահասի նկատմամբ որպես խափանման միջոց կիրառվել է տնային կալանք և բացակայելու արգելք:

Նշենք, որ Քննչական կոմիտեից հայտնել էին, որ քրեական վարույթի նախաքննության ընթացքում ձերբակալվել է 37 անձ:
19 անձի նկատմամբ հարուցվել է հանրային քրեական հետապնդում՝ Քրեական օրենսգրքի 327-րդ հոդվածի 1-ին մասով (զանգվածային անկարգություններին մասնակցելը) և 486-րդ հոդվածի 2-րդ մասի 1-ին կետով (մի խումբ անձանց կողմից նախնական համաձայնությամբ արդարադատության իրականացմանը կամ գործի քննությանը միջամտելը), 10 անձի նկատմամբ՝ 486-րդ հոդվածի 2-րդ մասի 1-ին կետով (մի խումբ անձանց կողմից նախնական համաձայնությամբ արդարադատության իրականացմանը կամ գործի քննությանը միջամտելը) և 46-327-րդ հոդվածի 1-ին մասով (զանգվածային անկարգություններին մասնակցելուն դրդելը): 

Քրեական վարույթի նախաքննությունը շարունակվում է: