«Լույսի ծածկագիրը». ինտերակտիվ ներկայացում Ավետիք Իսահակյանի տուն-թանգարանում

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Դերասանուհի Ալլա Սահակյանը և ռեժիսոր Քրիստինե Ասրյանը հայ մեծ բանաստեղծ Ավետիք Իսահակյանի 150-ամյակի առթիվ հրաշալի անակնկալ են պատրաստել փոքրիկներին և մեծերին՝ «Լույսի ծածկագիրը» տիկնիկային  ինտերակտիվ ներկայացումը:

Այն առաջարկում է միասին գտնել գիտության, սիրո, իմաստության, ճշմարտության լույսի ծածկագիրը՝ հայտնվելով Իսահակյանի հեքիաթների կախարդական աշխարհում:

 

«13 պերսոնաժ կա բեմադրության մեջ, տարբեր ոճի տիկնիկներ են, որոնք օգնում են ինձ, դառնում իմ գործընկերները: Ես մի քանի կերպարներ եմ խաղում: Հեքիաթի համար հատուկ մուլտֆիլմ է նկարվել, նաեւ երգ ունենք: Մի խոսքով, շատ լուրջ ձեւով ենք աշխատել»,-ասաց դերասանուհի Ալլա Սահակյանը:

Ներկայացման մասնակիցները միասին կճամփորդեն աշխարհից աշխարհ և կպարզեն, ո՞րն է աշխարհի «Ամենապիտանի բանը», ինչպե՞ս հասնել «Արևի մոտ», կծիծաղեն «Նուկիմ քաղաքի խելոքների» հետ:

«Մեր ռեժիսորը շատ հետաքրքիր մոտեցում գտավ, որով ամբողջ ներկայացումն է պարուրված և որը լավագույնս արտահայտում է Ավետիք Իսահակյանի հիմնական գաղափարախոսությունը՝ եթե չենք ուզում լինի ոգու սով, պետք է բերենք գիտության ու կրթության ու բարու լույսը»,- ասաց Ավետիք Իսահակյանի տուն-թանգարանի տնօրեն Արմինե Ավետիսյանը:

Ներկայացման մեջ լավագույնս համադրվել են իսահակյանական հեքիաթների հերոսները՝ ստեղծելով յուրօրինակ մի աշխարհ, որտեղ առատ հումոր կա: Իսկ հեքիաթի վերջում երեխաները կունենան անակնկալ՝ Ավետիք Իսահակյանի ծննդյան 150-ամյակի առիթով:

Հետևեք մեզ՝ այստեղ