Յուրատեսակ խմիչք, որի արտադրության մեջ բացառություններ չեն թույլատրվում. «Փաստ»

«Փաստ» օրաթերթը գրում է.

Floc de Cascogne-ը խմիչք է, որը պայմանականորեն կարելի է անվանել գինի։ Պայմանականորեն, քանի որ այն պատրաստվում է՝ խառնելով թարմ քամած խաղողի հյութը և կոնյակի 60 %–ոց սպիրտը։ Նման խմիչքների համար իրականում գոյություն ունի առանձին անվանում՝ միստել: Միստելները ստացվում են խաղողի սպիրտին ավելացնելով տարբեր խմորման աստիճանի սուսպենզիաներ: Floc de Gascogne միստելի դեպքում այդ սուսպենզիան չխմորված է, այսինքն՝ սովորական խաղողի հյութ է։ Վերջնական արտադրանքում ալկոհոլի պարունակությունը տատանվում է 16-18 %-ի սահմաններում։ Floc de Gascogne-ը լինում է սպիտակ և կարմիր գույնի: Այդ խմիչքի պատմական հայրենիքը, ինչպես կարելի է ենթադրել նրա անունից, ֆրանսիական Գասկոն նահանգն է, որը հայտնի է իր գինեգործության ավանդույթներով։

Floc de Gascogne միստելի բաղադրատոմսի պատմությունը հասնում է մինչև 16րդ դար: Համաձայն Գասկոնի տարածաշրջանի գինեգործության բավականին խիստ կանոնակարգերի, Floc de Gascogne-ի արտադրության համար պետք է օգտագործվի արմանյակային սպիրտ և խաղողի հյութ, որոնք արտադրվում են նույն գինեգործարանում: Բացառություններ չեն թույլատրվում, ուստի արտադրության բոլոր փուլերը տեղի են ունենում մեկ գինեգործարանում՝ նույն մասնագետների հսկողության ներքո։ Ավելին, յուրաքանչյուր գինեգործարան իր տրամադրության տակ ունի խաղողի այգիներ, որտեղ աճեցնում են խաղողի այն բոլոր տեսակները, որոնք անհ ր ա ժ ե շ տ ե ն F l o c d e Gascogne-ի ստեղծման համար: Նշենք նաև, որ այդ, պայմանականորեն ասած, գինիները AOC վկայական են ստացել միայն 1990 թվականին:

Կարմիր Floc de Cascogne-ի պատրաստման համար օգտագործվում են խաղողի հատուկ տեսակներ՝ Մարլո, Կաբերնե, Ֆրան և Տաննա: Սպիտակների համար՝ Ունի բլան, Սովինյոն և Կոլոմբար: Անհրաժեշտ խաղողի տեսականի աճեցնելուց հետո ամբողջ հյութը քամում են և հիմնական մասից թորում արմանյակ։ Բոլոր պահանջվող փուլերն անցնելուց հետո երկու բաղադրիչները (խաղողի հյութը և արմանյակը) խառնվում են որոշակի համամասնությամբ՝ կուպաժիստների ուշադիր ղեկավարությամբ: Հասնելով բույրի և համի անհրաժեշտ համադրությանը՝ ստացված խառնուրդը լցնում են ապակե շշերի մեջ, այնուհետև հատուկ նկուղներում թողնում հնանալու առնվազն 45 շաբաթ։

Ենթադրվում է, որ այդ միստելի լավագույն տարիքը 2-3 տարին է, երբ նրա համային ծաղկեփունջը բացահայտվում է առավելագույնս։ Floc de Gascogne-ը, ինչպես և շատ միստելներ, հիանալի ապերիտիվ է: Բացի դա, ճիշտ ընտրված սնունդը կարող է ստիպել նոր ձևով վերաբերվել այդ ըմպելիքի համին: Floc de Gascogne-ը հիանալի համադրվում է ընկույզի, չորացրած մրգերի և սեխի հետ։

Մանրամասները՝ «Փաստ» օրաթերթի այսօրվա համարում