Ի՞նչ են փնտրում հայ փորձագետները Բաքվում

Այսօր առավոտյան Հայաստանի քաղհասարակության հինգ ներկայացուցիչներ պատասխան այցով Բաքու են մեկնել՝ մասնակցելու համատեղ քննարկումներին։ Թե ովքեր են այդ ցանկում, դեռ հայտնի չէ, ԶԼՄ-ներից մեկի հետ զրույցում քաղաքագետ Բորիս Նավասարդյանն էր հայտնել, որ մեկնելու է Բաքու։ Երկու երկրների կառավարությունների նախաձեռնությամբ ստեղծված փորձագիտական խմբերի երևանյան հանդիպումը մեկ ամիս առաջ կայացավ։

Այն սկանդալով ուղեկցվեց․ պարզվեց, որ ադրբեջանական պատվիրակության կազմում էր շուրջ երեք տարի առաջ Լաչինի միջանցքը փակած ու արցախահայության շրջափակմանը սկիզբ դրած այսպես կոչված «էկոակտիվիստներից» մեկը՝ Դիլարա Էֆենդիևան։ Հայկական պատվիրակությանը տեղափոխող ավիաընկերության օդանավը, ըստ Flightradar24-ի, Բաքու է ժամանել առավոտյան 10-ին։ Չարթերային թռիչքի ծախսերը Հայաստանի կառավարությունն է հոգալու, գործադիրը որոշել է 17.5 միլիոն դրամ տրամադրել, իսկ արդեն կեցության ծախսերն ադրբեջանական կողմը կիրականացնի։

Ադրբեջանում քաղհասարակություն, փաստացի, գոյություն չունի, Ալիևի ռեժիմի հատուկենտ քննադատներն էլ կալանավորվում են երամներով, իսկ Հայաստան այցելած կամ Բաքվում հայ փորձագետներին «հյուրընկալող» անձինք էլ Ադրբեջանի նախագահականի դուդուկի տակ պարող, հակահայկական նարատիվներ առաջ մղող անձինք։ Այս ֆոնին առնվազն տարօրինակ է բյուջեից գումարներ վատնելը, Բաքու մեկնելը, այդկերպ միջազգային ասպարեզում Ադրբեջանին լեգիտիմացնելը։ Թեպետ փաշինյանական իշխանությունից այլ բան սպասել չարժեր։

Աննա Մարգարյան