«Խաղասեղանին սերն է» ֆիլմի պրեմիերան եւ հայ հայտնիների կարծիքները . լուսանկարներ

Wnews.am-ը գրում է.

Փետրվարի 11-ին «Մոսկվա» կինոթատրոնում տեղի ունեցավ «Խաղասեղանին սերն է» ֆիլմի հայաստանյան պրեմիերան:

Ֆիլմը նկարահանել է ռուսական «Небо» կինոընկերությունը։ «Խաղասեղանին սերն է» ֆիլմի հիմքում ընկած է «Poker.am» կինոկատակերգության սյուժեն։ Ֆիլմում օգտագործված է նաև «Poker.am»-ի սաունդթրեքը:

«Խաղասեղանին սերն է» ռոմանտիկ կինոկատակերգութան նկարահանումներն իրականացվել են Ռուսաստանում և Միացյալ Նահանգներում (Լաս Վեգաս, Լոս Անջելես):

Ֆիլմի ռեժիսորն Արտյոմ Միխալկովն է, դերերում են Հովհաննես Ազոյանը, Անդրեյ Բուրկովսկին, Ալեքսանդր Ռևան, Եկատերինա Շպիցան, Ալլա Միխեևան և ուրիշներ։

Ֆիլմի պրեմիերայի ավարտից հետո հայ հայտնիները Wnews.am-ի հետ զրույցում կիսվեցին ֆիլմի մասին իրենց տպավորություններով.

Հայաստանի Հանրային հեռուստառադիոընկերության խորհրդի նախագահ Ռուբեն Ջաղինյան.

Շատ բարի ֆիլմ էր իր օրիգինալ ավարտով։ Ամենակարեւորն այն է, որ Հայաստանում նկարված մի պրոեկտ վերցրին եւ ադապտացիա արեցին Ռուսաստանում։ Անկեղծ ասած, Հայաստանի տարբերակն ինձ համար ավելի մոտիկ էր, բայց դա իմ սուբյեկտիվ կարծիքն է։ Շնորհավորում եմ բոլոր մասնակիցներին։ Այսօր ֆիլմի պրեմիերան տեղի ունեցավ ոչ միայն Հայաստանում, այլ նաեւ Ռուսաստանում։ Կարծում եմ, որ այն հետաքրքիր կլինի նաեւ Ռուսաստանում եւ կունենա իր հանդիսատեսը։

Դերասանուհի, հաղորդավարուհի Նազենի Հովհաննիսյան.

Եթե փորձենք զուգահեռներ տանել, ապա ասեմ, որ «Poker.am»-ն ինձ համար շատ ավելի հետաքրքիր էր՝ անկեղծ ասած: Բայց սա ավելի մասշտաբային էր և դրանում էր ֆիլմի յուրօրինակությունը: Բացի դրանից՝ «Poker.am»-ն առավելապես մեր միջավայրի մասին էր, իսկ սա ռուսական ու ամերիկյան միջավայրերի միախառնումն էր: Ամեն մի ֆիլմ ունի իր առանձնահատկությունը: Մի բան, սակայն, կարող եմ հաստատ ասել՝ այս ժանրում Հովհաննեսը գտել է իր տեղն ու դերը, առանձնահատկությունն ու ազդեցությունը: Նա մի հայացքով շատ ավելին կարողացավ ասել, քան շատ մարդիկ երկար տեքստերով։

Ֆիլմի գլխավոր դերակատար Հովհաննես Ազոյան.

Սա էլ իր հմայքով ֆիլմ է։ «Poker.am»-ն առաջինն է եւ այն համարում եմ 1990-ականներից հետո նոր շրջանի ամենահաջողված ֆիլմը։ Կարծում եմ, որ այդ ֆիլմին դրամատուրգիայի առումով Հայաստանում հաղթելը դժվար է։ Իհարկե, կցանկանամ, որ լինեն ավելի ուժեղ ֆիլմեր։
Ֆիլմում ամենասիրելի հատվածն է, երբ իմ հերոսը պատմում  կարմիր մեքենայի մասին։

Հաղորդավարուհի Լիլիթ Մուրադյան.

Հետաքրքիր, պոզիտիվ ֆիլմ էր։ Եվս մեկ հետաքրքիր խաղ էր ռուս դերասանների հետ եւ ողջունում եմ, որ նման համագործակցություններ են լինում։ Ամեն դեպքում, ֆիլմից հետո բարձր տրամադրություն ես ունենում։

Հաղորդավար Վահե Խանամիրյան.

Չնայած, որ ամեն ինչն արդեն տեսել էինք, հետաքրքիր էր շատ, զվարճալի, բարի եւ անսպասելի էլեմենտներով։

Հաղորդավար Էրիկ Անթառանյան.

Ստացված եւ հաջող ֆիլմ է։ Հաճելի էր եւս մեկ անգամ Հովհաննես Ազոյանին տեսնել նմանատիպ ֆիլմում։Հետաքրքիր ռեպրոդուկցիա էր, մեծ հաճույքով դիտեցի եւ մյուսներին եւս խորհուրդ կտամ դիտել։