«Գուցե կյանքի հեգնա՞նք, թե՞ ճակատագրի նվեր էր, այն, որ աղջիկը ուշանում է...». ինչպես է նկարահանվել «Անավարտ թռիչք» ֆիլմը, ո՞վ է եղել իրական հերոսուհին և որտեղ է հիմա նա

«Նրանցից յուրաքանչյուրն իր հետ տարավ պատմության մի մասնիկ, նրանցից յուրաքանչյուրն անավարտ թողեց մի թռիչք...»:

2006 թվականի մայիսի 3-ին Երևան-Սոչի չվերթն իրականացնելիս «Արմավիա» ընկերության Airbus A320 ինքնաթիռն ընկավ Սև ծովը։ Ավիավթարի հետևանքով 113  մարդ զոհվեց։

Այս ողբերգության վերքերը մինչև այսօր չեն սպիացել և դժվար էլ թե սպիանան: Դժվար է նորից վերապրել այդ ողբերգության մանրամասներն ու դրվագները: Եվ ահա եկավ մի օր, երբ ռեժիսոր Ելենա Արշակյանն ու սցենարիստ Անահիտ Մխիթարյանը որոշեցին նկարահանել ֆիլմ, որը ոչ թե կլինի ֆիլմ ավիավթարի մասին, այլ կլինի ֆիլմ` հիշատակի մասին:

Ուսումնասիրելով թեման, անգամ հարուցված քրեական գործերը՝ ռեժիսորը կանգ է առել մի պատմության վրա։ 9 տարի առաջ սկիզբ է առնում մի սիրո պատմություն՝ լի դրամատիզմով, բուռն ապրումներով ու հույզերով։

Պարարվեստի ուսումնարանի ուսանողուհու և բռնցքամարտիկ երիտասարդի միությանը խոչընդոտող հանգամանքները զարգանում են այնպես, որ սիրահարները ստիպված են լինում հեռանալ, ավելի ճիշտ՝ փախչել երկրից, տղայի որոշմամբ՝  մեկնել Սոչի։ Բայց աղջկա հայրը կանխում է դստեր փախուստը. տղան օդանավակայանից միայնակ է ուղևորվում Սոչի։ 

Սակայն գուցե կյանքի հեգնանք, թե ճակատագրի նվեր էր, այն, որ աղջիկը ուշանում է: Հասնում է օդանավակայան, այն ժամանակ, երբ արդեն ինքնաթիռը տեղից պոկված է լինում: Եվ ահա ժամեր անց տարածվում է գույժը՝ Airbus A320 ինքնաթիռն ընկել է Սև ծովը: Աղջիկը կորցնում է սիրած տղային, բայց նախախնամության կամքով նրանց սերն ու միությունը շարունակվում է, շարունակվում է այն փոքրիկի մեջ, որը նրանց արգելված սիրո պտուղն է։ 

Պատմություն, որի մեջ արտացոլված է մի ամբողջ 113 մարդկային ճակատագրեր, պատմություն, որը իմանալուց հետո անհնար է չհուզվել ու չարտասվել: 

Վերջին ժամանակներում, թերևս, հայկական կինոարտադրության ոլորտում, եթե ոչ ամենահաջողված, ապա հաջողված ֆիլմերից մեկն է: 

Ֆիլմի մեծ էկրաններին հայտնվելուց հետո, չգտնվեց մեկը ով ոգևորությամբ ու լի հույզերով չարտահայտվի կատարած մեծ աշխատանքի մասին: Նկարահանվել էր ֆիլմ, որում ոչինչ ու ոչ ոք ավելորդ չէր, չկար մի բան, որը իրական չլիներ: Հմուտ դերասանական խաղի ու նկարահանման հրապարակում պրոֆեսիոնալ անձնակազմի միջոցով ստացվեց այն պատմությունը, որը ավելի պատկերավոր է դարձնում այդ օրվա ամեն մի վայրկյանը:

«Հիշողությունները ակնթարթներ են, որ մեզ մի պահ տանում են անցյալ, բայց պատահում է, որ մի ամբողջ կյանք դառնում է հիշողություն. հիշողության մեջ է այն ամենը, ինչ ստիպում է քեզ անընդհատ հետ նայել»:

Ստորև Ձեզ են ներկայացնում ֆիլմի նկարահանման հրապարակից լուսանկարներ

Պատրաստեց Past.am-ը: