«Հանես» փոթորկի պատճառով Ֆինլանդիայի էլեկտրացանցում ռեկորդային խափանում է գրանցվել

Ֆինլանդիայում մոլեգնող «Հանես» փոթորիկը բացառիկ լուրջ վնաս է հասցրել Elenia էլեկտրացանցային ընկերության սպասարկման գոտում, հայտնում է Yle-ն։

«Ըստ մեր գնահատականների, սա վերջին տասը տարվա ամենամասշտաբային խափանումն է, որը գերազանցում է նույնիսկ անցյալ տարվա նոյեմբերին տեղի ունեցած «Յարի» փոթորկի հետևանքները»,- ասել է Elenia-ի արտակարգ իրավիճակների պատրաստվածության գծով ղեկավար Հեյկի Պաանանենը։

Ըստ Պաանանենի, Elenia-ն փոթորկին սկսել է պատրաստվել դեռ Սուրբ ծննդից առաջ՝ առաջին կանխատեսումներից հետո։ Սակայն տարերքն անակնկալի է բերել իր ուժգնությամբ։

Դեկտեմբերի 28-ի առավոտյան ժամը 9-ի դրությամբ Ֆինլանդիայում շուրջ 115 000 տնային տնտեսություն դեռևս հոսանքազրկված էր, որոնցից ավելի քան 42 000-ը Elenia-ի հաճախորդներն են։ Elenia ընկերությունն աշխատում է Հարավային և Հյուսիսային Պոհյանմաայում, Կենտրոնական Ֆինլանդիայում, Պիրկանմաայում, ինչպես նաև Կանտա-Հյամե և Պյայյատ-Հյամե տարածաշրջաններում։

Պաանանենը հայտնել է, որ տեղանքում վնասները լուրջ են, իսկ վերանորոգման աշխատանքները բարդ խնդիր են։ Այս պահին գրանցվել է անսարքությունների վերացման շուրջ 700 հայտ, և ակնկալվում է, որ մինչև խափանման ամբողջական վերացումն այդ թիվը գրեթե կկրկնապատկվի։

«Հանես» փոթորիկը նախորդ գիշեր զգալիորեն ծանրաբեռնել է նաև Պիրկանմաա տարածաշրջանի փրկարար ծառայության աշխատանքը։ Փրկարար ծառայությունը հայտնում է, որ երեկոյան ժամը 8-ից մինչև առավոտյան 8-ը ստացվել է վնասների վերացման հետ կապված գրեթե 600 կանչ։