Կոմիտասի թանգարան-ինստիտուտում ներկայացվեցին Միրզոյանի կամերային ստեղծագործությունները

Հայ կոմպոզիտորական արվեստի 7-րդ փառատոնի շրջանակում Կոմիտասի թանգարան-ինստիտուտում ներկայացվեցին Էդվարդ Միրզոյանի կամերային ստեղծագործությունները։ Փետրվարի 12-ին անցկացված համերգային երեկոյին մասնակցեց Հայաստանի պետական երիտասարդական նվագախմբի լարային քառյակը և մի շարք մենակատարներ:

«Այս փառատոնն անցկացվում է ՀՀ Նախագահ Սերժ Սարգսյանի բարձր հովանու ներքո: Այսօրվա համերգային ծրագրում Միրզոյանի կամերային գործերն են, ռոմանսները: Բացի երիտասարդական նվագախմբի լարային քառյակից, հանդես են գալիս երգիչներ, որոնք հիմնականում Կոմիտասի անվան պետական կոնսերվատորիայի շրջանավարտներ են և ուսանողներ»,-«Արմենպրես»-ի հետ զրույցում նշեց «Հայաստանի պետական երիտասարդականնվագախումբ» ՊՈԱԿ-ի տնօրեն Սարգիս Բալբաբյանը:

Համերգի ընթացքում հնչեցին Միրզոյանի «Ասում են, թե», «Երազ տեսա», «Դու հասկացար», «Հիմա հիշում եմ», «Վերհուշ ռոմանսները», ինչպես նաև Սոնատ թավջութակի և դաշնամուրի համար ստեղծագործությունը` նվիրված Մստիսլավ Ռոստրոպովիչին և այլ գործեր:

ՀՊԵՆ լարային քառյակի կազմում հանդես եկան Էրիկ Մանուկյանը (առաջին ջութակ), Անի Ադիկյանը (երկրորդ ջութակ), Ելենա Հայրապետյանը (ալտ), Էլյա Բալասանյանը (թավջութակ):

Անվանի կոմպոզիտոր Էդվարդ Միրզոյանի 95-ամյակին նվիրված Հայ կոմպոզիտորական արվեստի 7-րդ փառատոնի մեկնարկը տրված է: Հայաստանի պետական երիտասարդական նվագախումբն աշխարհահռչակ ջութակահար Սերգեյ Խաչատրյանի հետ հունվարի 15-ին ազդարարեցին փառատոնի բացումը:

Հայաստանյան արդի մշակութային կյանքում 6 տարի շարունակ իր տեղն է գրավում Հայ կոմպոզիտորական արվեստի փառատոնը: Հայ կոմպոզիտորական դպրոցի ավանդույթների և ներկայիս ձեռքբերումների պահպանմանն ուղղված ծրագրի կազմակերպիչներն են Հայաստանի պետական երիտասարդական նվագախումբը և Հայաստանի կոմպոզիտորների միությունը: Ստեղծման առաջին իսկ օրվանից փառատոնն անցկացվում է ՀՀ Նախագահ Սերժ Սարգսյանի բարձր հովանու ներքո և ՀՀ մշակույթի նախարարության աջակցությամբ: