Սևաքարցիները հին Նոր տարին նշեցին նոր հանդիսությունների սրահում

2026 թվականին հին Նոր տարին կրկնակի տոն դարձավ այս անգամ Սևաքար գյուղի բնակիչների համար։ Հունվարի 13-ին հանդիսավորությամբ շահագործման է հանձնվել գյուղի հանդիսությունների սրահի նոր շենքը, որի բացման և կարմիր ժապավենի կտրման պատիվը տրվել է վարչական ղեկավար Արման Դավթյանին և «Զանգեզուրի պղնձամոլիբդենային կոմբինատ» ՓԲ ընկերության կայուն զարգացման գծով տնօրեն Արմեն Ստեփանյանին։

Լուսավոր, բարեկարգ և առավել հարմարավետ դարձած հանդիսությունների սրահը վերանորոգվել է 2024 թվականի սուբվենցիոն ծրագրի շրջանակում՝ համայնք-կառավարություն համաֆինանսավորմամբ՝ շուրջ 31 մլն 500 հազար ՀՀ դրամ ներդրմամբ, որում համայնքի մասնաբաժինը՝ շուրջ 13 մլն ՀՀ դրամը ֆինանսավորել է «ԶՊՄԿ» ՓԲ ընկերությունը։ Նորաբաց սրահն ամբողջությամբ կահավորելու, անհրաժեշտ գույքով և պարագաներով ապահովելու հարցում ևս համայնքին աջակցել է «Զանգեզուրի պղնձամոլիբդենային կոմբինատ» ՓԲ ընկերությունը/շուրջ 4մլն 600 հազար ՀՀ դրամ/։

Սրահի շահագործման մեկնարկի և տոների կապակցությամբ ներկաներին շնորհավորել է Կապան համայնքի ղեկավար Գևորգ Փարսյանը՝ հույս հայտնելով, որ հանդիսությունների սրահը գյուղացիներին կծառայի նախևառաջ ուրախ և հիշարժան միջոցառումներ կազմակերպելու համար: Իր խոսքում նա շնորհակալություն է հայտնել բոլոր գործընկերներին, ովքեր ևս ներկա են գտնվել միջոցառմանը, ծրագրի լիարժեք և արդյունավետ իրականացմանը մասնակցելու համար։

Ավանդույթի համաձայն, համայնքի ղեկավարի կողմից գյուղացիների համար կազմակերպվել էր նաև տոնական հյուրասիրություն: