Ինչո՞ւ շտապօգնությամբ «Արմենիա» ԲԿ տեղափոխված պացիենտներին չեն ցանկացել սպասարկել

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին 

«Արմենիա» բժկական կենտրոնում հերքում են նախօրեին տարածված լուրն այն մասին, թե շտապօգնությամբ հիվանդանոց դիմած  երկու քաղաքացուն բուժօգնություն չեն տրամադրել։ NEWS.am Medicine-ի հետ զրույցում բուժկենտրոնի փոխտնօրեն Աշոտ Կուրղինյանը հայտնեց, որ տղամարդիկ եղել են ալկոհոլի ազդեցության տակ։ Նրանք տեղում զննվել են, արձանագրվել է, որ ինտոկսիկացիա՝ ալկոհոլային թունավորում չի գրանցվել, հոսպիտալացման կարիք չի եղել։ «Մենք մարդկանց դեմքով չենք որոշում` ընդունել, թե ոչ», - ասաց նա։

Դեպքի մասին երեկ երեկոյան հայտնել էր ֆոտոլրագրող Գագիկ Շամշյանը` հրապարակելով «Արմենիա» բուժկենտրոնի բակում սպասող շտապօգնության մեքենաների լուսանկարները և տեսանյութ։ Նա հայտնել էր, որ շտապօգնության բժիշկները շարունակում են բուժօգնություն ցուցաբերել երկու պացիենտներին, որոնցից մեկը Հնդկաստանի քաղաքացի է, մինչդեռ «Արմենիա» ԲԿ-ից ոչ ոք չի մոտեցել նրանց։ Այլ հիվանդանոց շտապօգնության բժիշկները չեն դիմել, քանի որ «Արմենիա» ԲԿ-ն է այն մասնագիտացված կենտրոնը, որտեղ կա տոքսիկոլոգիական ծառայություն։ Աղբյուրը նաև նշել էր, որ վերջին ժամանակներում շատ բողոքներ են ստացվում այն մասին, որ «Արմենիա» ԲԿ-ում շտապօգնությամբ տեղափոխված պացիենտներին չեն ընդունում։

«Շտապօգնություն» ՓԲԸ-ի տնօրեն Ռուբեն Գրիգորյանը NEWS.am Medicine-ի հետ զրույցում, ըստ էության, չհերքեց, որ բուժառուներին հրաժարվել են ընդունել «Արմենիա» ԲԿ–ում։ Նշեց, որ  միայն դեպքի հնչեղություն ստանալուց հետո են ԲԿ–ի բժիշկները զննել նրանց։

«Լինում են դեպքեր, երբ Երևանի բոլոր հիվանդանոցների ռեանիմացիաներում ասում են, որ ազատ մահճակալ չունեն, և շտապօգնության բրիգադն անելանելի վիճակում է հայտնվում։ Նման դեպքերում ես իմ կողմից թույլ եմ տալիս բուժառուին թողնել ընդունարանում և հեռանալ։ Առողջապահության նախարարի հրաման կա, որ բոլոր հիվանդանոցներում պետք է 10 տոկոս ազատ մահճակալ պահեն շտապօգնության դեպքերի համար։ Տեղի ունեցածը ճիշտ գործելաոճ չէ։ Այս սեզոնին, երբ սուր շնչառական վարակները շատ են, նման դեպքեր հաճախ են գրանցվում»,– ասաց նա։

Դեպքին անդրադարձել է «Առողջության իրավունք» հասարակական կազմակերպության նախագահ Անուշ Պողոսյանը, որն իր ֆեյսբուքյան էջում գրել է, որ «դեպքը չի կարող հիմնավորվել ո՛չ ծանրաբեռնվածությամբ, ո՛չ «տեղի բացակայությամբ»՝ հատկապես այն դեպքում, երբ տվյալ բժշկական կենտրոնը ունի տոքսիկոլոգիայի և ռեանիմացիայի լիարժեք գործող ծառայություններ։ Երբ շտապօգնությունը հիվանդին հասցնում է բուժհաստատություն, բուժօգնության շարունակականությունը դառնում է ոչ թե ընտրության, այլ պարտադիր կատարման հարց։

Սակայն այս միջադեպը առավել վտանգավոր երանգ է ստանում այն ֆոնին, երբ հասարակության մեջ շրջանառվում են «օդում կախված լուրեր»․ ըստ այդ տեղեկությունների՝ առողջապահության նախարարությունը չի ֆինանսավորել բժշկական կենտրոնին ավելի քան 100 մլն դրամի չափով, և առկա է ոչ հրապարակային հրահանգ՝ «քիչ հիվանդ ընդունելու» վերաբերյալ։

Եթե այս տեղեկությունները իրականությանը չեն համապատասխանում, ապա ՀՀ առողջապահության նախարարությունը պարտավոր է դրանք անհապաղ, հստակ և հրապարակային հերքել։ Եթե, այս լուրերը ճշմարտության հետ առնչություն ունեն, ապա խոսքը այլևս ոչ թե կառավարման բացթողման, այլ քաղաքացիների կյանքի հաշվին ընդունված քաղաքական որոշման մասին է»։

NEWS.am Medicine-ի հետ զրույցում Անուշ Պողոսյանը նշեց, որ տեղի ունեցածը բժշկական օգնության մասին օրենքի խախտում է. «Ի՞նչ է նշանակում՝ բուժառուին թողնել մեքենայի մեջ։ Կա ընդունարան հասկացություն։ Բուժառուին պետք է ախտորոշման ծառայություն մատուցվեր, այնուհետև որոշվեր հիվանդի հետագա բուժման պլանը», - ասաց նա։

Աղմկահարույց դեպքին անդրադարձել է նաև ՀՀ Առողջապահության նախարարության մամուլի խոսնակ Մարիամ Ծատրյանը, այնուամենայնիվ չպարզաբանելով, թե ինչու է առաջացել նման խնդիր, երբ պացիենտները շտապօգնության մեքենաների մեջ բավական երկար սպասել են «Արմենիա» հիվանդանոցի մուտքի մոտ, և սպասարկվել են միայն խնդիրը հանրայնացնելուց հետո։

««Արմենիա» ՀԲԿ-ի բուժանաձնակազմին լավ ծանոթ այս տղամարդիկ մեկ անգամ չէ, որ ալկոհոլային ինտոկսիկացիայից դուրս գալու համար այս բուժկենտրոնում բուժօգնություն են ստացել. երբևէ հաշվի չի առնվել ո՛չ նրանց ազգային պատկանելությունը, ո՛չ վճարունակ լինել- չլինելը:

Սակայն, երեկ նույն այս տղամարդիկ բուժօգնության կարիք չեն ունեցել, հետևապես, բժիշկների արձանագրմամբ` Սուր թունավորումների և վերակենդանացման բաժանմունք կամ որևէ այլ բաժանմունք հոսպիտալացնելու ցուցում չի եղել:

«Արմենիա» ՀԲԿ-ի բժիշկները, այդ թվում` վերակենդանացման բաժանմունքի վարիչը, մոտեցել են շտապօգնության մեքենային ու տեղում զննելով տղամարդկանց, պարզել` նրանք ընդամենը ալկոհոլի ազդեցության տակ են եղել, ինտոկսիկացիոն վիճակ չի եղել:

Հայտնի տեսանյութի նկարահանումից րոպեներ անց տվյալ անձինք սթափվել են և իրենց ոտքով հեռացել», - իր ֆեյսբուքյան էջում գրել է ԱՆ խոսնակը։

NEWS.am Medicine-ի հետ զրույցում Մարիամ Ծատրյանը նշեց, որ նախարարության կողմից բուժկենտրոնին չվճարված գումարների մասին տեղեկատվությունը պետք է ճշտի, նման տեղեկություն այս պահին չունի, բայց հավելեց, որ բժշկական կենտրոնները պետք է բուժօգնություն տրամադրեն անկախ բոլոր հանգամանքներից, քանի որ դա քաղաքացիների սահմանադրական իրավունքն է։

Հետևեք մեզ՝ այստեղ