Չի՛ կարելի ընտրակաշառք տալ քաղաքական կուսակցությանը. Ազատ Արշակյանը՝ ՀՀԿ-ՀՅԴ կոալիցիայի մասին

Past.am-ը զրուցել է Գերագույն խորհրդի նախկին պատգամավոր Ազատ Արշակյանի հետ՝ Սերժ Սարգսյանի ելույթի, կոալիցիայի և այլ ներքաղաքական հարցերի հետ կապված:

- Որո՞նք էին Սերժ Սարգսյանի վերջին ելույթի շեշտադրումները, հիմնական ուղերձները:

-Դա իր պաշտոնից հեռացող նախագահի վերջին ուղերձն էր և հրաժեշտի խոսքը: Նախընտրական քարոզարշավի սկիզբ կարելի է համարել: Ուղերձ էր յուրայիններին, ուղերձ էր հանրությանը, որ նախագահը չի մոռացել Հայաստանի Հանրապետության օրակարգը: Նախկինում այդ օրակարգի կետերի մասին ասվել է, բայց չի կատարվել: Սարգսյանը փորձում է համոզել, որ վճռական է և վերջին մեկ տարում կանի այդ քայլերը:

Այն հարցերը, որոնք շոշափվեցին ելույթում, այսօր չեն ծագել: Հարց է առաջանում՝ ինչո՞ւ մինչև հիմա բան չի արվել: Չի՞ ցանկացել անել, թե՞ հնարավոր չի եղել: Առաջին տարբերակը բացառենք, որովհետև յուրաքանչյուր քաղաքացի ուզում է, որ իր հայրենիքը բարգավաճի, ղեկավարն էլ կուզենա լավ համբավ թողնել: Ինքն ուզել է, բայց խանգարող հանգամանքներ են եղել:

-Շրջապա՞տն է խանգարել:

-Այո՛, իր թիմակիցները խոչընդոտել են, շահերի բախում է եղել՝ հասարակության և նոմենկլատուրայի կամ ադմինիստրացիայի շահերի բախում: Այն թիմը, որի օգնությամբ Սերժ Սարգսյանը դարձել է նախագահ, նրան թույլ չի տվել, որպեսզի Հայաստանը դարձնի ժողովրդավարական, ազատ և բարգավաճ երկիր:

-Միայն դրանո՞վ եք պայմանավորում ամեն ինչ:

-Արտաքին միջամտությունն էլ է խանգարող հանգամանք: Բազմաթիվ սխալներ են տեղի ունեցել, քանի որ եղել է հայկական պետության կործանման սպառնալիքը: Հայաստանում այս տարիներին եղել է 4 d` դեպոպուլիացիա, դեինդուստրիալիզացիա, դեսոցիալիզացիա և դեսուվերենիզացիա: Այդ ամենը չարիք է եղել մեր գլխին: Դա ոչ թե մեր ապաշնորհության արդյունք է, այլ պարտադրված է մեզ: Մենք պետք է հերթով այդ թիրախները հաղթահարենք: Եթե վերջին նախագահը դա չլուծի, ապա կասենք՝ անհաջող նախագահ և տասը տարի ունեցանք:

- Իսկ ինչո՞ւ չեն շտապում հստակեցնել՝ ի՞նչ պաշտոններ են կիսելու ՀՅԴ-ի հետ:

-Շատ կոպիտ սխալ արեցին: Սա թե՛ «Դաշնակցության» համար է վատ, թե՛ՀՀԿ-ի, թե՛ Հայաստանի Հանրապետության: Ժողովրդավարական երկրում հենց այնպես պաշտոններ բաշխելը, քաղաքական ընտրակաշառք տալը սխալ է: Դաշնակներն էլ են հասկանում, որ իրենց կաշառք են տալիս, կաշառք տվողը՝ ՀՀԿ-ն, նույնպես դա հասկանում է, հասարակությունը նույնպես հասկանում է, որ ՀՀ-ում բացահայտ տեղի է ունենում քաղաքական կոռուպցիա: Չի՛ կարելի ընտրակաշառք տալ քաղաքական կուսակցությանը, չի՛ կարելի քաղաքական մրցակցությունը պակասեցնել: Դրա համար էլ դեռ դժվարանում են հստակեցնել:

-Իսկ Հրանտ Բագրատյանի՝ բոլոր ընդդիմադիրների միավորման և կոալիցիայի առաջարկին ինչպե՞ս եք վերաբերվում: Առաջարկն իրատեսակա՞ն է:

-Սխալ և իրատեսական չէ: Այդ բոլոր ընդդիմադիրների շահերը շատ տարբեր են: Միանան, որ ինչ անեն: Ես նույնիսկ դեմ եմ, որ ՀՅԴ-ն միանա ՀՀԿ-ին: Քիչ առաջ խոսեցինք այդ մասին: Ծրագրերի շուրջ պետք է միացում լինի: 20-30 կուսակցություն միանում են, որ պաշտո՞ն ստանան: Պետք է անվանական ասվեր՝ ծանոթ ենք ձեր քաղաքական, տնտեսական ծրագրին և հրավիրում ենք համագործակցության: Ես շատ հարգում եմ Հրանտ Բագրատյանին, պատրաստ եմ նրա ծրագրերին աջակցել, բայց այդ մոտեցումը չեմ կիսում:

- ԵԱՀԿ ԺՀՄԻԳ-ը քննադատություններ հնչեցրեց՝ սահմանադրական հանրաքվեի հետ կապված: Մեր իշխանություններին այդ ամենը մտահոգո՞ւմ է:

-Կարծում եմ՝այո: Կան ուժեր, որոնք Հայաստանում խանգարում են ժողովրդավարությանը: Այդ ուժերն ունեն հովանավորներ: Եթե հովանավոր չլինի, ապա նրանք պատասխան են տալու իրենց խախտումների համար: Վաղ թե ուշ, պետք է բոլորը պատասխան տան: Հարցազրույցում ես թվարկեցի մեզ խանգարող 4 d-երի մասին: Այն ուժերը, որոնք այդ 4 d-երի առաջացման հիմք են ստեղծել, պետք է պատժվեն:

Հարցազրույցը՝ Լևոն Փանոսյանի