Հայաստանում մեկնարկել է Հայկական ուռուցքաբանական 6-րդ կոնգրեսը

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին 

«Հայկական ուռուցքաբանություն. համարձակ ծրագրերից դրանց իրագործում»։ Այս խորագիրն է կրում այսօր Երևանում մեկնարկած Հայկական ուռուցքաբանական 6-րդ ամենամյա կոնգրեսը։ Այն միտված է գնահատելու Հայաստանում ուռուցքաբանության արդի վիճակը և զարգացման ուղիներն ու հնարավորությունները, խորացնելու համագործակցությունը Հայաստանի տարբեր կենտրոնների մասնագետների միջև, ինչպես նաև նոր կապեր ձևավորելու արտերկրի գործընկերների հետ։

«Վստահաբար կարող ենք ասել, որ կոնգրեսը արդեն գիտագործնական մի մեծ հարթակ է դարձել քաղցկեղի դեմ մեր ընդհանուր պայքարի ներկան և ապագան քննարկելու համար։ Հայաստանի առողջապահական համակարգի վերջին տարիներին որդեգրած քաղաքականությամբ ուռուցքաբանությունը քայլ առ քայլ անցնում է գաղափարախոսությունից դեպի համակարգային փոփոխություններ, նորարական մոտեցումներից դեպի իրական արդյունքներ, բոլոր ջանքերն ուղղելով պացիենտների կյանքի որակի և բուժման արդյունավետության բարելավմանը»,- իր բացման խոսքում նշեց Վ․Ա․ Ֆանարջյանի անվան Ուռուցքաբանության ազգային կենտրոնի տնօրեն Կարեն Ծառուկյանը։

Հայաստանում ԱՀԿ ներկայացուցիչ, դոկտոր Սիդարթա Դատտան իր ելույթում նշեց, որ քաղցկեղով հիվանդացությունն աճում է ամբողջ աշխարհում, ինչպես զարգացող, այնպես էլ զարգացած երկրներում։ Մասնավորապես՝ Եվրոպական տարածաշրգանում ամեն չորրորդ բնակիչը քաղցկեղի ռիսկի խմբում է։ Քաղցկեղի ուսումնասիրման միջազգային գործակալության գնահատմամբ, քաղցկեղի դեպքերի թիվը 2000 թվականից աճել է 30 տոկսով, իսկ բուժօգնության արժեքը՝ 60 տոկոսով։ Ըստ կանխատեսումների՝ 2050 թվականին 2020 թվականի համեմատ քաղցկեղի նոր դեպքերի թիվը կաճի 77 տոկոսով, և դա պայմանավորված է բազմաթիվ գործոններով, այդ թվում՝ կյանքի տևողության երկարացմամբ։  

Դատտան նշեց, որ քաղցկեղի դեպքերի մի մասը հնարավոր է կանխարգելել, և դրանց ռիսկի գործոնները հայտնի են՝ ծխախոտը, ալկոհոլը, սնունդը։ Եվ այդ գործոնների դեմ պայքարում, ըստ նրա, Հայաստանը մեծ աշխատանք է տարել։ Նա նաև ողջունեց Հայաստանում համընդհանուր բժշկական ապահովագրության ներդրումը։

Առողջապահության նախարար Անահիտ Ավանեսյանը կարևորեց նման ձևաչափով մասնագիտական շփումները, քանի որ «տեղեկատվական հոսքը, գիտական հոդվածների քանակները, տեխնիկական ու տեխնոլոգիական նոր լուծումները այնքան արագ են մտնում մեր կյանք, որ ամեն անհատ ինքնուրույն շատ դժվարություն է ունենում մարսելու, վերցնելու և այս նորարարությունները իր աշխատանքային պրակտիկայում կիրառելու համար»։ «Եվ նման կոնգրեսները, նման մտքերի փոխանակությունը, փորձի փոխանակությունը հնարավորություն են տալիս, որ մենք միասնական ձևաչափով կարողանանք վերցնել այս գիտելիքի, փորձի նոր պաշարը և աշխատենք ի շահ պացիենտի», - ասաց նա, հավելելով, որ այդ ամենից բացի կարևոր է նաև բուժման ֆինանսական հասանելիությունը, և դրան է ուղղված առողջության համընդհանուր ապահովագրության ներդրումը։

Կոնգրեսի մասնակիցներին ողջունեցին նաև արտերկրից ժամանած հյուրերը։ ՌԴ գլխավոր ուռուցքաբան Անդրեյ Կապրինը նշեց, որ վաղուց չի եղել «այս հրաշալի երկրում», հավելելով, որ հայ ուռուցքաբանների ավագ սերնդի հետ պարբերաբար շփումների մեջ է։ Նա կարևորեց կոնգրեսի անցկացումը, որպես հարթակի, որտեղ կարելի է տեսնել, թե Հայաստանում և այլ երկրներում ինչ են անում, և ցույց տալ, թե ինչ նորություններ կան այս ոլորտում Ռուսաստանում։ Անդրեյ Կապրինը տեղեկացրեց, որ Ռադիոլոգիայի ինստիտուտը, որը նա գլխավորում է, անվճար ուսուցման հնարավորություն է տրամադրում, այդ թվում արտերկրի երիտասարդ մասնագետների համար, ապահովելով նաև կացությունը։

«Իհարկե, մենք պետք է բարեկամություն անենք, քանի որ նոր տեխնոլոգիաները հնարավոր չէ թաքցնել իրարից։ Ու հենց նոր տեխնոլոգիաներն են թույլ տալիս մեզ մոտեցնել ուռուցքաբանական հիվանդությունների հանդեպ հաղթանակը», - ասաց նա։

Միխայիլ Խայտինը ներկայացրեց Հայդելբերգի համալսարանական կլինիկայի հնարավորությունները, ևս շեշտելով, որ Հայաստանից երիտասարդ բժիշկները կարող են դիմել իրենց մասնագիտական վերապատրաստման նպատակով։

NEWS.am Medicine-ի հետ զրույցում ՈՒԱԿ-ի տնօրեն Կարեն Ծառուկյանը հայտնեց, որ հայկական ուռուցքաբանական կոնգրեսի մասշտաբներն ու աշխարագրությունը գնալով ընդկայնվում են․ այս տարի մասնակցում են 400 պատվիրակներ, հյուրեր 10 երկրից, կներկայացվեն մոտ 100 զեկույցներ։ Այս տարվա նորամուծություններից են ուղիղ հեռարձակմամբ վիրահատությունները, որոնք կիրականացվեն Ուռուցքաբանության ազգային կենտրոնի վիրահատարաններում, և կհեռարձակվեն կոնգրեսի դահլիճում։ Վիրահատությունները կկատարեն Հայդելբերգի համալսարանական կլինիկայի վիրաբույժները։

«Երբ որ մենք ունենք բազմաթիվ վիրաբուժական նյութեր, հիմնականում ի՞նչ է արվում, դասական դեպքերն են ներկայացվում, համացանցում տեղ են գտնվում դասական ընթացք ստացած վիրահատությունները, իսկ այս դեպքում արդեն վիրահատությունը իր հնարավոր դժվարություններով, ամեն ինչը լինում է տեսանելի և մեկնաբանելի», - ասաց նա։

Հետևեք մեզ՝ այստեղ