Պարզիր, թե որ խառնվածքին ես պատկանում

Blog.1in.am-ը գրում է .

Որքա՜ն հաճախ է պատահում, որ մարդու հետ շփվելիս չենք դադարում զարմանալ, թե որքան տարբեր ենք: Ընկալումները, որոշումներ կայացնելու արագությունը և անգամ շարժումների արագությունը բացարձակ տարբեր են լինում: Երբեմն նման տարբերությունը հիացնում է, երբեմն` զայրացնում: Սակայն ի՞նչ է այս ամենը նշանակում, և արդյո՞ք կարելի է իդեալականի հասցնել մեր խառնվածքը: Եկեք ուսումնասիրենք մարդկանց խառնվածքի տեսակները:

Խառնվածքի տեսակները

Սանգվինիկ

Այս խառնվածքի տեր մարդիկ հեշտորեն հարմարվում են նոր պայմաններին, ակտիվորեն արձագանքում են այն երևույթներին, որոնք հետաքրքրում են իրենց: Նրանք հեշտորեն կառավարում են իրենց էմոցիաները և եռանդով ձեռնարկում են նոր գործեր: Նրանց բնորոշ են տրամադրության հաճախակի փոփոխությունները, սակայն նրանց հիմնական հատկանիշը կենսուրախությունն է:

Արդյո՞ք կարելի է ինչ-որ կերպ պարզել, որ տվյալ մարդը սանգվինիկ է, թե ոչ: Այո՛: Որպես կանոն` սանգվինիկները սահուն և վստահ քայլվածք ունեն, նրանց շարժումներն արագ են և թեթև: Սանգվինիկներն առանձնանում են ճիշտ կեցվածքով և արտահայտիչ ժեստերով: Դիմախաղն ու ժեստիկուլյացիան հարուստ են և բնական, խոսքը` բարձր և հստակ:

Այս խառնվածքի տեր մարդկանց թերությունն այն է, որ նրանք հեշտորեն շեղվում են գործերից կամ էմոցիաներից, եթե արտաքին ազդակները երկար ժամանակ անփոփոխ են մնում: Երբ զգացողությունները չեն թարմանում, սանգվնիկները դառնում են անտարբեր և դանդաղաշարժ:

Խոլերիկ

Խոլերիները դյուրագրգիռ են և անհավասարակշիռ, նրանց ուշադրությունը շեղելը հեշտ բան չէ:  Նրանք չափազանց շարժուն են, նրանց զգացմունքներն ուժեղ են և արտահայտվում են վառ կերպով: Մեծ եռանդով սկսում են նոր գործեր, ամբողջովին նվիրվում են դրանց, սակայն իրենց ուժերի ոչ ադեկվատ գնահատումը հանգեցնում է աշխատունակության կտրուկ նվազման: Այս խառնվածքի տեր մարդկանց թերությունը կայանում է իրենց անհավասարակշռված լինելու մեջ, որի պատճառով էլ առաջանում են նրանց խնդիրները:

Խոլերիկների առաձնահատկություններն են արագ, ընդհատվող խոսքը, վառ և արտահայտիչ դիմախաղը: Խոլերիկները դժվարությամբ են նույն տեղում մնում, հաճախ վեր են թռչում, փոխում են դիրքերը, առատ և կտրուկ ժեստիկուլյացիա ունեն: Նրանց քայլվածում ինչ-որ վանող բան կա:

Մելանխոլիկ

Նրանք պասիվ են, հանգիստ, հեշտ խոցելի են և քիչ են արձագանքում արտաքին ազդակներին: Հաճախ մելանխոլիկները դուրս չեն գալիս իրենց ներաշխարհից, նախընտրում են հանգիստ, իրենց ծանոթ միջավայր: Այս խառնվածքի առավելությունն է իրենց զգացմունքների խորությունն ու հաստատունությունը:

Այս խառնվածքի տեր մարդիկ զուսպ, սակայն արագ քայլվածք ունեն: Նրանք տարված են իրենց մտքերով, ուստի իրենց դանդաղաշարժությունը հասկանալի է: Նրանց ժեստերը սահմանափակ են: Անծանոթ մարդկանց շրջապատում իրենց լավ չեն զգում: Խոսքը դանդաղ է, հաճախ ընդհատումներով, իսկ արագությունը տատանվում է:

Ֆլեգմատիկ

Այս մարդիկ համառ են, նրանք բռնել են կյանքի հստակ և հանգիստ ուղին: Նրանք վստահելի մարդիկ են, ում դժվար է հունից հանել: Ֆլեգմատիկները շատ չեն արտահայտում իրենց էմոցիաները: Նրանց թերությունն այն է, որ շատ թույլ են արձագանքում արտաքին ազդակներին:

Ֆլեգմատիկները ծանր շարժուձև ունեն, ալարկոտ, հանդարտ քայլվածք ունեն: Նրանք երկար ժամանակ կարող են նույն դիրքում նստել: Իրենց դեմքի արտահայտությունից երբեք չես գուշակի, թե ինչ են նրանք զգում: Նրանք չխոսկան են, չեն սիրում աղմուկ և բարձր խոսք:

Իհարկե, խառնվածքի այս չորս տեսակները գիտական հստակ ուսումնասիրությունների արդյունք են, սակայն նրանց տարբերակումն այնքան էլ հեշտ չէ: Շատ հազվադեպ է պատահում, որ մարդու մոտ հանդիպում է խառնվածքի կոնկրետ մի տեսակ: Որպես կանոն` մարդու խառնվածքը երկու կամ երեք տեսակների խառնուրդ է: Գտե՛ք ձեզ: