Ռուսաստանում ապրող ամենաազդեցիկ հայերի բուրգը

Ամենաազդեցիկ հայը Ռուսաստանի հայերի միության նախագահ Արա Աբրահամյանն է: Նրա ազդեցիկության միավորը չափվում է նրանով, որ նա միակ հայն է, ով ընկերական հարաբերություններ ունի Ռուսաստանի նախագահի հետ և այդ ընկերական հարաբերություններն օգտագործում է ոչ թե սեփական բիզնեսներն ընդլայնելու, այլև հայության խնդիրները Ռուսաստանում և նրա սահմաններից դուրս լուծելու համար: Արա Աբրահամյանն այս տարիների ընթացքում դարձել է անփոխարինելի լիդեր Ռուսաստանի հայության շրջանում և այսօր նրա ազդեցությունն այնքան է մեծացել, որ նույնիսկ այլազգիները երկրի իշխանությունների հետ շատ հարցեր փորձում են լուծել Արա Աբրահամյանի օգնությամբ: Պետք է ասել, որ Արա Աբրահամյանը վերջին շրջանում ակտիվորեն մասնակցում է նաև Հայաստանին վերաբերող խնդիրների լուծմանը և հայ-ռուսական հարաբերություններում կարծես թե կամրջի դեր է կատարում, որպեսզի այդ հարաբերություններն էլ ավելի բարձր մակարդակի վրա գտնվեն: Բացի այդ, նա նաև հայտնի է որպես Հայաստանի իշխանությունների կողքին կանգնող անձնավորություն և երբեք չի միջամտում Հայաստանում կադրային քաղաքականությանը և իշխանություններին թուլացնելու որևէ գործողություն չի կատարում: Ընդհակառակը` նա պաշտպանում է Հայաստանի իշխանությունների շահերը և փորձում է աջակցել, որպեսզի իշխանությունները ուժեղ լինեն և կարողանան հավասարը հավասարի հետ խոսել այլ պետությունների ղեկավարների հետ:

Հաջորդ ամենաազդեցիկ դեմքը, ըստ մեզ, «Տաշիր» ընկերության սեփականատեր Սամվել Կարապետյանն է, ով, փաստացի, Ռուսաստանում ապրող ամենահարուստ հայն է: Նա իր ֆինանսական կարողություններն ուղղում է նաև հայության խնդիրների լուծմանը և Ռուսաստանում ապրող հայերի համար նա, կարծես թե, ֆինանսական մի համակարգ է ստեղծել, և բոլոր նրանք, ովքեր Ռուսաստանում խնդիրներ են ունենում դիմում են Սամվել Կարապետյանին: Սամվել Կարապետյանն իր աշխատատեղերում առաջնահերթություն է տալիս նաև հայի գործոնին և այնպես է անում, որ հայերը կարողանան աշխատանք գտնել և ապրել: Բացի այդ Սամվել Կարապետյանը նաև հսկայական ներդրումներ է կատարում Հայաստանի տնտեսության մեջ և բարեգործական մեծ արշավ է իրականացնում Հայաստանում:

Հաջորդ ամենաազդեցիկ դեմքը «Comedy Club»-ի սեփականատեր Արթուր Ջանիբեկյանն է: Ինչու՞ Արթուր Ջանիբեկյանը. քանի որ նա Ռուսաստանում ապրող հայերի նոր սերնդի լիդերն է, և կարելի է ասել` նա նոր մակարդակի բարձրացրեց հայ մարդու կերպարը Ռուսաստանում և ցույց տվեց բոլորին, որ հայերը ոչ միայն շինարարությամբ կամ առևտրային բիզնեսով կարող են հարստանալ, այլ նաև կարող են այսօր, 21-րդ դարին հարիր գործիքներով, դառնալ միլիարդատեր և բացի այդ, պահպանել սեփական ինքնությունը և հայկական գործոնը: Արթուր Ջանիբեկյանը ևս ստեղծել է ֆինանսական մի ամբողջ համակարգ, և այդ համակարգը ծառայեցնում է Հայաստանին և հայ մարդուն` միայն մի տարբերությամբ` թույլ չտալով գովազդել և ներկայացնել այն ամենը, ինչ նա կատարում է: Բացի այդ, Արթուր Ջանիբեկյանի միջոցով շատ երիտասարդներ կարողանում են ինտեգրվել և դառնալ շոու բիզնեսի և հեռուստատեսության աշխարհի մասնիկ, դառնալ հայտնի և փողեր աշխատել Ռուսաստանի Դաշնությունում:

Ռուսաստանում երկար տարիներ իր ազդեցիկությունը պահպանում է նաև Արթուր Չիլինգարովը: Մարդ, ով ժամանակին ամենաազդեցիկ հայն է եղել ՌԴ-ում և այսօր էլ պահպանում է իր ազդեցիկությունը` նպաստելով հայկական գործոնի զարգացմանը և հայկական խնդիրների լուծմանը: Արթուր Չիլինգարովը ևս շատ բազմաբովանդակ կապեր ունի Ռուսաստանի իշխանությունների բարձր օղակների մարդկանց հետ, և այդ կապերն օգտագործվում է հայկական գործոնի զարգացման համար: Պետք է նշենք, որ դեռևս սովետական տարիներից էլ Արթուր Չիլինգարովը եղել է Մոսկվայի ազդեցիկ դեմքերից մեկը, և այդ ազդեցիկությունը շարունակվում է նաև այս պահին: Ճիշտ է նա ֆինանսական մեծ կարողություններ չունի, բայց նրա անձնական հեղինակությունն ու անձնական կապերն ավելին արժեն, քան, միգուցե, մեծ ֆինանսական միջոցները:

Գարիկ Մարտիրոսյանը վերջին տարիների ընթացքում դարձել է, թերևս, ամենաճանաչված հայը ՌԴ-ում և հետաքրքիրն այն է, որ նա անընդհատ իր գործունեության ընթացքում ցույց է տալիս իր հայկական արմատները, փորձում է հայկականությունը տարածել Ռուսաստանում և նրա ազդեցիկությունը կայանում է նրանում, որ նա թերևս ամենասիրված և ճանաչված հայն է ՌԴ-ում: Բացի այդ, նա փորձում է նաև իր պահվածքով, իր ոճով, իր աշխատելաոճով մեղմացնել ազգային փոքրամասնությունների նկատմամբ բազմազգ Ռուսաստանում ռուսների վերաբերմունքը: Գարիկ Մարտիրոսյանին սիրելով, հարգելով, նրան երկրպագելով` փոխվում է նաև վերաբերմունքը հայերի նկատմամբ: Գարիկ Մարտիրոսյանը նաև Ռուսաստանի հայ երիտասարդության համար լեգենդ է` ընդգծված առաջատար և նա համարվում է, թերևս, ամենահաջողակ և հայ երիտասարդի համար իդեալական կերպար Ռուսաստանում:

Արմեն Ջիգարխանյանը տարիներ շարունակ եղել է ամենաճանաչված հայը ՌԴ-ում, բայց այսօր, ակնհայտորեն, նա իր տեղը զիջում է Գարիկ Մարտիրոսյանին, քանի որ տեղի է ունենում սերնդափոխություն, բայց միևնույն է Ջիգարխանյանը մնում է որպես սիրված և ընդգծված լիդեր հայության շրջանում և նրան ևս մենք դասում ենք ամենաազդեցիկ հայերի շարքին:

Ամենաազդեցիկ հայերից է նաև Ռուսաստանում Հայ Առաքելական եկեղեցու ներկայացուցիչ, Ռուսաստանի թեմի առաջնորդ Եզրաս Սրբազանը, ով կարողացավ իր գործունեության շնորհիվ Ռուսաստանում ապրող ամենատարբեր հայերին միավորել, համախմբել և այդ ներուժը օգտագործել հայկական գործոնի, Հայ Առաքելական եկեղեցու ապագային միտված գործունեության համար: Հենց Եզրաս Սրբազանի գործունեության շնորհիվ էր, որ հնարավոր եղավ Մոսկվայում կառուցել և ավարտին հասցնել Հայ Առաքելական եկեղեցու նոր հսկա շինությունը: Բացի այդ, նա ունի նաև ներքին ազդեցության լծակներ, և այսօր կարելի է նրան համարել Ռուսաստանում ամենաազդեցիկ հայերից մեկը:

Դանիլ Խաչատուրովը համարվում է Ռուսաստանում ապրող հայերի շրջանում ևս ամենահարուստ մարդկանցից մեկը: Նրա կարողությունը ևս անցել է միլիարդի շեմը և նա իրականում մեծ ազդեցություն և հարգանք է վայելում Ռուսաստանի բիզնես միջավայրում: Նրան ավելի շատ հարգում և ընդունում են հենց ռուսաստանյան շրջանակները: Խաչատուրովի կապը հայության հետ այնքան սերտ չէ, ինչպես Սամվել Կարապետյանի պարագայում է, բայց նա ևս քողարկված կերպով աջակցություն է ցուցաբերում Ռուսաստանում ապրող հայերին, և Ռուսաստանում ապրող հայերի մի լուրջ շրջանակ նրա միջոցով աշխատանք են ստանում և նրա միջոցով լուծում են իրենց խնդիրները: Դանիլ Խաչատուրովը ևս վերջին տարիներին Հայաստանում սկսել է բիզնես ներդնել` «Ռոսգոսստրախ» -ը բերելով Հայաստան: Բացի այդ, նա ևս համարվում է ամենաազդեցիկ հայը ՌԴ-ում:

Ռուսաստանում ազդեցիկ դեմքերից է նաև գործարար Ռուբեն Վարդանյանը, ով ՌԴ-ի իշխանությունների և բիզնես միջավայրի կողմից ընկալվում է որպես ինտելեկտուալ գործիչ: Ռուբեն Վարդանյանը ևս մեծ գումարներ ունի և այդ գումարները ծառայեցնում է հայկական գործոնի զարգացմանը: Պետք է նկատել, որ նա հաճախ չի մասնակցում բարեգործական նախագծերի: Նա ավելի շատ բիզնես ներդրումներ է կատարում ՀՀ-ում` «ՏաԹևեր» համալիրի կառուցմամբ, «Ամերիաբանկի» և մի շարք նմանատիպ նախագծերի ստեղծմամբ: Ակնհայտորեն նա ևս ազդեցիկ գործիչ է և նրա գործունեությունը պատիվ է բերում հայ ժողովրդին և ՀՀ-ը:

Ռուսաստանի ազդեցիկ դեմքերից է նաև Գենադի Ստեփանյանը: Նա երկար տարիներ աշխատել է դատախազության համակարգում, որից հետո մտել է մասնավոր բիզնես սեկտոր: Նրան են պատկանում Մոսկվայի ամենահայտնի բիզնես կառույցներից մեկը` «Երևան Պլազան»: Գենադի Ստեփանյանը նաև ՀՀ երկրոդ նախագահ Ռոբերտ Քոչարյանի շատ մտերիմ ընկերն է, և Սիրուշոյի ու Քոչարյանի կրտսեր որդու` Լևոն Քոչարյանի ամուսնության կնքահայրը: Գենադի Ստեփանյանը բացի այն, որ ունի ֆինանսական մեծ լծակներ, ունի բավականին ազդեցիկ կապեր Ռուսաստանի և Հայաստանի իշխանավորների հետ: Նա ևս իր կապերն օգտագործում է հայկական գործոնի զարգացման համար: